Өчигдрийн гол дуулиан болсон УИХ-ын гишүүн Х.Баттулгыг сэжиглэн шалгасан үйл явдлын эргэн тойрон дахь мэдээлэл одоо ч олны анхаарлыг татаж байна. УИХ-ын гишүүн Х.Баттулгын Баянгол зочид буудал дахь ажлын өрөө рүү Эрүүгийн цагдаагийн газрын эдийн засгийн гэмт хэрэгтэй тэмцэх хэлтсийнхэн болон тусгай албаныхан дайрч орж байна гэх мэдээллийг өчигдөр 15.50 минутын орчимд түүний туслах анх олон нийтийн сүлжээнд түгээсэн. Уг мэдээллийг сонссон хүмүүс шууд утгаар нь УИХ-ын гишүүн Х.Баттулгыг баривчлах гэж байна гэж шуугиж байв. Гэхдээ цагдаа болон тусгай албаныханы ажиллагаа өчигдөр 15.00 цагт биш үүнээс хоёр цагийн өмнө буюу 13.00 цагт эхэлсэн байжээ. Хуулийн байгууллагынхан Х.Баттулга гишүүний өрөөнд нэгжлэг, шалгалт хийж эхлэх үед түүнтэй хамт УИХ-ын гишүүн Д.Ганбат, Л.Эрдэнэчимэг нар хамт байжээ. Тэд бол Х.Баттулга гишүүний улс төрийн дотны хамтрагчид бөгөөд нэг фракцид харъяалагддаг юм. Эх сурвалжийн мэдээлж буйгаар нийт 30 гаруй цагдаа тус зочид буудал руу нэвтэрч ажиллагаа явуулсан бөгөөд хэнийг ч оруулж, гаргахгүйгээр орчныг битүүмжилж бүх хүмүүсийн гар утсыг унтраалгасан байдаг. Сүүлд нэмж 50 орчим цагдааг авчирч ажиллуулсан юм.

Х.Баттулга гишүүнийг баривчлах гэж байна гэх мэдээллийг сонсоод маш олон хүн Баянгол зочид буудлын өмнө цугласан. Тэдгээрийн дунд Зам тээврийн сайд М.Зоригт, УИХ-ын гишүүн АН-ын бүлгийн дарга Б.Гарамгайбаатар, АН-ын ЕНБД-ын үүрэг гүйцэтгэгч Л.Эрхэмбаяр, УИХ-ын гишүүн Ж.Батзандан, Г.Уянга, УИХ-ын даргын зөвлөх Г.Байгальмаа, хотын дарга Э.Бат-Үүл, сүмо бөхийн их аварга Д.Дагвадорж, Хөдөлмөрийн баатар, олимпийн аварга Н.Түвшинбаяр тэргүүтэй бөхчүүд, Жүдо бөхийн эрэгтэйчүүдийн багийн ахлах дасгалжуулагч О.Балжинням, “Херо” энтэртайнментын захирал Б.Баатар байснаас гадна Х.Баттулга гишүүний хүүхдүүд ирээд байлаа.

Тэд энэ талаар юу гэж ярьсаныг хүргэе.

Зам тээврийн сайд М.Зоригт:- Энэ тухай мэдээллийг сошиалаас аваад ирлээ. Арай үгүй байлгүй дээ.

АН-ын бүлгийн дарга Гарамгайбаатар:  Ямар ч мэдээлэл байхгүй болохоор хариулт өгөх боломжгүй байна. Би үүнийг харах гэж ирсэн. Х.Баттулгыг баривчлах гэж байна гэх мэдээллийг ордноос аваад ирлээ.

УИХ-ын гишүүн Ж.Батзандан: Өргөдлийн байнгын хороонд УИХ-ын гишүүн Х.Баттулгын албан өрөөнд хууль бусаар нэгжлэг хийж байна гэсэн мэдээлэл ирсэн. Хууль хяналтынхан нэгжлэгийг яаж хийдэг, хүний эрхийг дээдэлж байна уу, зөрчиж байна уу гэдгийг нүдээрээ харахаар ирлээ. Цагдаагийн мөрдөн шалгах ажиллагаа, баривчилгаа сүүлийн үед хэрээс хэтэрч байна. Өдөр болгон нэг баривчилгаа хийдэг болсон.  Монгол орон бол ардчилсан орон. Аливаа хэргийг мөрдөн шалгах ажиллагаа хуулийн дагуу, хүний эрхийг дээдлэх зарчмын хүрээнд явах ёстой. Тиймээс би Өргөдлийн байнгын хорооны даргын хувьд нөхцөл байдалтай газар дээр нь танилцахын тулд хүрэлцэн ирээд байна.

Нийслэлийн Засаг дарга Э.Бат-Үүл: - Нэгжлэг хийхэд яагаад тусгайгийнхан ирдэг юм. Хуулиар бол нэгжлэг хийх гэж байгаа бол мөрдөн байцаагч, прокурор хийх ёстой. Би хувьдаа хууль зөрчсөн л гэж харж байна.

УИХ-ын дарга З.Энхболдын зөвлөх Г.Байгалмаа: -Фэйсбүүкээр мэдээлэл аваад ирлээ. УИХ-ын гишүүний халдашгүй дархан байдалд халдаж, хууль зөрчиж байгаад харамсаж байна. Х.Баттулгатай холбоотой төмөр замын асуудал, мэдээлэл нь олон нийтэд нээлттэй байгаа.

 Сүмогийн аварга Д.Дагвадорж: - Би дөнгөж сая твиттерээс мэдээлэл аваад яарч, сандраад ирлээ. Хамтдаа хүлээцгээе. Учрыг нь лавлая

 Х.Баттулгын охин Б.Намуун: Тавантолгойн асуудал дээр дуугарсан болгоныг шалгаж байгаа нь тун харамсалтай. Одоо бүх зүйл ил цагаандаа гарлаа. Аавыг маань баривчлах юм шиг байна.

Н.Түвшинбаяр: Яг ямар зүйл болсон талаар тодорхой мэдээлэл аваагүй байгаа учраас хүлээж л байна” гэсэн юм. Түүнчлэн маргааш жүдо бөхийн Азийн аварга шалгаруулах тэмцээнд явах тамирчид хүртэл энд ирсэн нь тамирчдад сөргөөр нөлөөлөх үү гэсэн сэтгүүлчийн асуултад тэрбээр “Ерөнхийлөгч маань ийм байдалтай байхад бид нар унтаж чадахгүй шүү дээ.

Эднээс сүмогийн их аварга Д.Дагвадорж хотын дарга Э.Бат-Үүл нар хамгийн их шүүмжлэлийг хүртэв. Н.Энхбаярын ч баривчилгаан дээр давхиж явсан Д.Дагвадорж аваргыг “Эсгий хийх газар нохой хэрэггүй” гэгчээр юм бүхэнд гүйж явах нь хэтэрхий хэрэгт дуртай мэтээр ойлгуулж байна хэмээн олон нийт шүүмжилж байлаа. Харин Э.Бат-Үүл дарга энд дуугарч явах нь харин ч нэг зохимжгүй байсан юм. Харин  УИХ-ын гишүүн Г.Уянга, “Херо”-ийн Б.Баатар нар өөрсдийг нь хүрээд ир гэсэн. Яг юу болоод байгааг мэдэхгүй байна гэх тайлбарыг өгсөн. УИХ-ын гишүүд болон зарим хүмүүс Баянгол зочид буудлын арын хаалгаар дамжин орж Х.Баттулга гишүүнтэй уулзсаныг доорх зургаас харж болно.

Өдрийн 16.00 цагаас эхлэн бужигналдсан уг үйл явдлын талаар ЦЕГ-аас 18.00 цагт тайлбар хийв. ЦЕГ-ын ХМОНХ-ийн хэлтсийн дарга Б.Баатархүү “Х.Баттулга гишүүний эзэмшлийн “Түмэн хишигтэн”, “Баялгийн хувь” ХХК-д Байцаан шийтгэх хуулийн дагуу, прокурорын зөвшөөрөлтэйгөөр санхүүгийн шалгалт хийх шаардлага гарсан. Цагдаагийн албан хаагчдыг олноор нь дайчилсан шалтгаан нь шалгалт явуулах үеэр гарч болзошгүй үймээнээс сэргийлэх үүднээс урьдчилсан арга хэмжээ авсан.  Энэ нь Х.Баттулга гишүүнийг баривчлах гэж буй мэтээр хүмүүст ойлгогдоод байна. Тийм зүйл байхгүй” гэж мэдэгдсэн юм. Тэгэхээр цагдаагийхан дээрх хоёр компанийн санхүүгийн бичиг баримтыг өдөржин шалгасан байх нь. Мэдээж Х.Баттулга гишүүнийг давхар шалгаж буй нь тодорхой. ЦЕГ-ын уг мэдэгдэл олон хүнийг тайвшруулж, “Х.Баттулга гишүүнийг баривчлах нь” гэх ам дамжсан ярианд цэг тавьсан юм. Гэхдээ л Х.Баттулга гишүүний эргэн тойрнийхон уг мэдэгдэлд бүрэн итгэлгүй оройн 20.00 цаг хүртэл Баянгол зочид буудлын гадна эргэлдсэн гэж хэлж болно.

Санхүүгийн шалгалт 20.00 цагт дууссан. Цагдаагийнхан хэрэгт холбогдолтой болон зарим шаардлагатай бичиг баримтыг нөөтбүүкийн хамт авч явжээ.

Шалгалт дуусмагц УИХ-ын гишүүн Х.Баттулга гарч ирэн “Төмөр замын асуудал хувийн компани руу орж байгаад харамсаж байна” хэмээн хэлчихээд "Баянгол" зочид буудал руу гаа эргэн орсон юм.  Баянгол зочид буудал дахь ажиллагаа дууссаны дараагаар УИХ-ын гишүүн Д.Ганбат, Л.Эрдэнэчимэг, Г.Уянга нарын гишүүд түрүүлж гарч ирсэн. УИХ-ын гишүүн Д.Ганбат, Л.Эрдэнэчимэг нар “Хуулийн байгууллагын ажиллагаа хууль зөрчиж байна. Тавантолгойг авах том бүлэглэлийн явуулж буй үйл ажиллагаа. Сонгууль дөхсөн үед нэгийгээ ингэж хэлмэгдүүлж болохгүй. Х.Баттулга бол сайн хүн. Бид нар байсан тулдаа баривчлуулсангүй” гэх утгатай мэдэгдлийг хийсэн юм.  Харин УИХ-ын гишүүн Г.Уянга “Шалгалт явуулахын тулд ингэж сүр, дуулиан болох хэрэггүй байсан. Автобусаар дүүрэн цагдаа нар авчрах шаардлагагүй байсан гэж бодож байна” гэж хэлэв. Ийнхүү өчигдрийн асуудал намжсан. Гэхдээ эсрэгээрээ асуудал эхэлж ч байж мэднэ. Х.Баттулгыг онилсон хуулийн байгууллагын үйл ажиллагаа улам ширүүн болсныг өчигдрийн үйл явдал харууллаа. Цагдаагийнхан Х.Баттулга гишүүн рүү улам ойртсоор байна. Гэхдээ Х.Баттулга гишүүнд УИХ-ын гишүүний халдашгүй дархан эрх гэж бий.

АН-ынхан өнгөрсөн бямба гаригт Их тэнгэрт өргөтгөсөн хуралдаан хийсэн. Тус намын гишүүд “АН-ын бүлэг эв нэгдлийн хурлаа хийж ойлголцолд хүрсэн” гэх тайлбарыг хийж байсан ч тэгээгүй бололтой. Цаашид муудалцахгүй сайн найзална гэж ярьж байсан тус намынхан эвлэрээгүй гэдэг нь өчигдрийн ажиллагаагаар батлагдлаа. Өргөтгөсөн хуралдааны үеэр УИХ-ын гишүүн Х.Баттулга хоёр хүнээ баривчлуулсандаа гомдолтой байгаагаа илэрхийлэхэд намынхан нь түүнд тусалж, дэмжинэ гэж хэлжээ. Гэвч түүний гомдлыг хүлээж авч сонсох ёстой гол хүн болох Ерөнхийлөгч Ц.Элбэгдорж тус хуралдаанд ирээгүй учраас л өөрийг нь шалгах үйл явц үргэлжилсэн нь энэ. Магадгүй Ц.Элбэгдоржтой учраа ололцсон бол ингэхгүй ч байсан байж болно. Учир нь Х.Баттулгыг болон ойрын хүмүүсийг нь шалгах шил дараалсан ажиллагааны цаана Ерөнхийлөгч Ц.Элбэгдорж байгаа хэмээн олон нийт үзэж байгаа.

Тэрбээр Засгийн газрыг тараана гэдгээ өчигдөр болсон намын бүлгийн хурал дээрээ мэдэгдсэн байна. Тодруулбал, “Өнгөрсөн бямба гаригт асуудлаа ярьж шийдсэн гэж бодсон. Гэтэл дахиад хоёр хүнийг маань баривчилсан байна. Ийм эвлэрэл гэж байдаггүй юм. Хэрвээ асуудлаа шийдэхгүй бол МоАХ-ын хоёр сайдаа татан авч засгийг чинь унагаана. Засагтай чинь хариуцлага тооцно” гэж мэдэгджээ. Түүний туслах эмэгтэй болон ойрын бас нэгэн хүнийг уржигдар шөнө гэрээс нь баривчилсан байна. Тэгэхээр Х.Баттулга гишүүний ойрын 4 хүнийг хуулийн байгууллагынхан баривчилчихсан байна гэсэн үг. Тодруулбал, өөрийг нь Зам тээврийн сайдаар ажиллаж байхад төрийн нарийн бичгийн даргынх нь албан тушаалыг хашиж байсан Б.Батзаяаг баривчлан саатуулаад байгаа. Мөн туслах Г.Түвшинжаргалыг баривчлан саатуулж байгаад батлан даалтад гаргаж гадуур байцааж буй. Энэ хоёр дээр дахин хоёр хүнийг нь баривчилсан байгаа юм. Тэднийг шинэ төмөр замын төсөл болон Сайншандын аж үйлдвэрийн паркийн мөнгөнөөс их хэмжээний мөнгийг завшсан хэмээн сэжиглэж буй.

Х.Баттулга гишүүн болон Зам тээврийн сайд асан А.Гансүх нарыг ч мөн дээрх хэрэгт холбогдуулан шалгаж байгаа билээ.

Т.Хулан