Swat ийм бичигтэй хар хувцастнуудыг бид зөвхөн америк кинон дээрээс хардаггүй. Тусгай анги гэж нэрлэж заншсан цагдаагийн энэ нэгжийн үүрэг тодорхой. Зэвсэглэсэн юм уу зохион байгуулалттай бүлэг этгээдийн нийгэмд аюултай үйлдлийг таслан зогсоох. Тэрнээс хэн нэгэн Дорж юм уу Дулмааг тусгайгийнхан очиж барьжээ, гэрт нь нэгжлэг хийхэд байрыг нь тойрон хамгаалалтанд авчээ гэж та бүхэн сонсож байгаагүй. Харин шоронгоос зэвсэглэн оргосон этгээдийг саатуулах, согтуу бөх хүн зодоход очих, томоохон улстөрчдийг шалгахад тэд л оролцдог. Жирийн цагдааг нэг бөх зам дээр шанааных нь ясыг цөмөртөл зодсон бичлэг жилийн өмнө гарсан. Дараа нь тэр бөх уур хүрсэн гэж ярьсан байна лээ. Яасан ууртай бас бяртай юм бэ? Жирийн тэр цагдаа залуу байнга хүчний бэлтгэл хийдэггүй учраас хацраа цөмөртөл цохиулаад хохь нь л болсон. Нэг их хурлын гишүүн цагдааг олны нүдэн дээр алгадачихаад, ахын ёсоор ухамсрын шанаа өгсөн юм гэх бол бас л байх л зүйл. Гэхдээ зөвхөн Монголд.

Харин цагдаа ард түмэн хоёрын дунд битгий яс хая. Тэд чинь луйварчин баячуудын биш жирийн ардын төлөө ажиллаж тэднийг хамгаалах үүрэгтэй, адилхан ардын хүүхдүүд.

Байнга хүн рекетлэж, гэмтээж зоддог байсан начин Одхүү, согтуудаа Багшийн дээдийн гүүрэн дээр жирийн иргэд, эргүүлийн цагдаа нарыг шидэлж байсан харцага Ганхуяг, олон хүн рүү буудсан Бэгзсүрэн гээд дандаа том биетэй танхай этгээдүүдийг жирийн цагдаа биш тусгайгийнхан л очиж зогсоодог. Эсвэл олон “хөлсний цэрэгтэй” нөлөө бүхий улстөрчдийг шалгахад очдог. Хөлсний цэрэг гэдэгт нь хөлсөөр хамгаалан орилогчдыг хэлж байна. Жирийн иргэн тэгж жонхуурсан луйварчдыг хамгаалж очдоггүй. Сонирхож хардаг. Энэ луйварчныг барьж чадах нь уу гэж. Гэмт хэрэгтэн гэрийг нь ухаж, халаасыг нь тэмтрэхэд, танхайрч зодоход иргэд цагдаа дуудаж тэдний хамгаалалтанд ордог учраас юу ч хийгээгүй хүнийг яах ч үгүй гэдгийг сайн мэднэ. 

Өчигдрийн болсон явдлыг дахин дурьдах нь илүүц биз. Бөхчүүд бөөнөөр ирсэн байлаа. Зарим нь согтуу. Тийм газар жирийн мөрдөгчид юун шалгах, шагайж ч чадахгүй байсан нь ойлгомжтой. Хаалга болгон дээр арав хориороо, харин машин дотор бас л арав, хориороо дандаа бөхчүүд. Дээр нь баахан улстөрчид.

Тусгайгийнхны тусламжтай орсон мөрдөгчдийг гаргахгүй гэж хаалга үүдийг нь дарж, аль болох л үймээн гаргах гээд байсан. Настай авгай нарыг албаар цагдаа нар луу түлхэж ч байх шиг. Гэхдээ тэд тусгайгийнхан байсан учраас үймээн гаргаж чадаагүй. Жирийн цагдаа нарыг бол чирж гулдраад цохиж унагаад, дараа нь уур маш их хүрсэн гэх байсан.

Аль ч улсын мафийн түүхийг харахад бокс, бөх, карате гэх мэт хүчний талын спортынхныг ивээлдээ авч, тэднээр хамгаалалтаа хийдэг. Харин гүйлт, дугуй, байт харваа дэмждэг мафи гэж байхгүй. Тэгээд ч энэ хэдэн он бэ? Лав мафиуд галзуурсан 1920-оод оны Америк биш. Улсын мөнгө хэдэн зуун тэрбумаар нь хусахгүй бол женко гэнэ үү дон корлеоне гэнэ үү, ёстой лаагаа иднэ үү, луувангаа иднэ үү маньд ямар ч хамаа байхгүй. Харин цагдаа ард түмэн хоёрын дунд битгий яс хая. Тэд чинь луйварчин баячуудын биш жирийн ардын төлөө ажиллаж тэднийг хамгаалах үүрэгтэй, адилхан ардын хүүхдүүд. Эцэст нь ТОМ биетэй ТОМчуудын хандыг дарж байдаг тусгайгийнханд талархаж явдгаа илэрхийлье.

Э.Ганзориг