УИХ-ын гишүүн Х.Баттулга хуулийн байгууллагаар шалгуулахгүй гэсэн шарандаа Засгийн газрыг огцруулахаар бэлтгэж байна. Тэрбээр өөрийн дөрвөн хүнийг баривчлуулсандаа гомдолтой байгаагаа өнгөрсөн бямба гаригт хуралдсан бүлгийн хурал дээрээ мэдэгдсэн гэдэг. Цаашилбал, “Миний хүмүүсийг баривчилсаар байвал Засгийн газраас сайд нараа татна. Засгийн газрыг огцруулах болно” гэж хэлсэн байдаг.

Хуулийн байгууллагынхан түүний ойрын хүмүүс гэгдэх Зам тээврийн яамны Төрийн нарийн бичгийн дарга асан Б.Батзаяа, туслах Г.Түвшинжаргал мөн хоёр туслахыг нь саатуулан шалгаж байгаа. Х.Баттулгыг ч өөрийг нь мөн шалгаж буй бөгөөд өнгөрсөн даваа гаригт Баянгол зочид буудал дахь  “Түмэн хишигтэн”, “Баялгийн хувь” ХХК-д хийсэн нэгжлэг цаагуураа түүнийг л шалгаж буйн илрэл юм. Гэхдээ Х.Баттулгад УИХ-ын гишүүний дархан эрх гэж бий. Тиймээс түүнийг юу, юугүй баривчлаад аваад явна гэж үгүй юм.

Хуулийнхан Х.Баттулга болоод түүний ойрын хүмүүсийг шинэ төмөр зам болон Сайншандын аж үйлдвэрийн паркийн төслийн хөрөнгөнөөс их хэмжээний мөнгийг завшсан хэмээн сэжиглэж буй.

Цагдаагийн байгууллагааас тусгай албаныхантай хамтран зохион байгуулсан даваа гаригийн ажиллагаа Х.Баттулгыг сандаргаад зогсохгүй ямар нэгэн арга хэмжээг яаралтай авахыг сануулсан үйл явдал болсон.

Х.Баттулга ч нэн даруй Засгийн газрыг самарна гэдгээ өөрийн шадар цэрэг Л.Эрдэнэчимэгээр дайлгав. УИХ-ын гишүүн Л.Эрдэнэчимэг өнгөрсөн мягмар гаригт "Энэ баривчилгаа нэгжлэг бол цагдаагийн газраас хийж байгаа ажил. Тэгэхээр цагдаагийн газрын даргыг томилдог Ерөнхий  сайд, цагдаагийн газрын хийж байгаа хууль бус ажиллагааг зогсоохгүй бол дөрвөн сайдаа татна. МоАХ өөрсдийн сайд нарыг татаж Засгийн газрын унагаах чиглэл рүү явж магадгүй. Ийм ч шаардлагыг Ерөнхий сайдад тавьж байгаа” гэж мэдэгдсэн.

Түүний хэлээд буй дөрвөн сайд нь Гадаад хэргийн сайд Л.Пүрэвсүрэн, Хууль зүйн сайд Д.Дорлигжав, Зам тээврийн сайд М.Зоригт, ХХАА-н сайд Р.Бурмаа нар юм. Тэгэхээр эднийг эгүүлэн татаж Засгийн газрыг огцруулна гэсэн үг.

Тэгвэл Х.Баттулгын мэдлийн гэх  дөрвөн сайд Засгийн газраас гарах  эсэхээ ингэж тайлбарлалаа.

Хүнс, хөдөө аж, ахуйн сайд Р.Бурмаа: Юу яриад байгаа юм бэ. Би энэ талаар ярихгүй. Анх ярьсан хүнээс нь наадахаа очиж асуу.

Хууль сайд Д.Дорлигжав: Би энэ талаар ярихгүй.

Зам тээврийн сайд М.Зоригтын хувьд бие нь өвдсөн. Эмнэлэгт хэвтсэн гэсэн мэдээлэл байна. Түүнээс уг асуултыг асуухад ямар нэгэн хариу өгсөнгүй.

Гадаад хэргийн сайд Л.Пүрэвсүрэн нь Оросын холбооны Гадаад хэргийн сайдын айлчлалд бэлтгээд тун чиг завгүй яваа учир утсаа ч авсангүй.

Ямартай ч тэд уг асуудлаар тодорхой тайлбар хийсэнгүй. Монгол улсын Засгийн газарт ажиллаж буй сайдуудын хувьд төрийн ажлыг тогтвортой явуулах, өөрийн хэрэгжүүлж буй бодлогыг салбартаа үргэлжлүүлэх, сонгууль дөхсөн үед олон нийтийг бужигнуулахгүй байхыг тэргүүнд тавьж байгаа бол "Би Засгийн газраас гарахгүй. Миний өмнөөс хэн, нэгэн дураараа дуугарч болохгүй" гэж хэлэх байсан биз. Дуугүй байна гэдэг "Засгаас гарч магадгүй. Гарахгүй ч байж магадгүй. Фракцийн тэргүүн мэднэ" гэдгээс ялгаагүй сонсогдож байна. Эхлээд фракц дотроо шийдье гэдэг байдалтай байгаа нь АН дотор намын биш бүлэглэлүүдийн эрх, ашиг илүү үйлчилдэг гэдгийг харуулсан бас нэгэн жишээ болж байна.

24tsag.mn