Ж.Эрдэнэбатын тэргүүлэх Засгийн газрын танхимын сайдуудын нэрс  тодроод эхэлсэн.  Түүний танхимын сайдаар  томилогдох эрхмүүдийн нэрс дотор туршлагатай улстөрч, “төмөр хатагтай”  Т.Гандигийн нэр явж байгаад олон нийт толгой дохин хүлээн авч байна лээ.  Т.Гандийг хэвлэлийн салбараас төрсөн шилдэг улстөрчдийн нэг гэдгийг хэн бүхэн андахгүй. Ер нь сэтгүүлч хүн төр-нийгмийн гүүр болж байдаг.   Т.Ганди нийгмийн хамгааллын чиглэлээр туршлагатай,  мэргэшсэн эрхэм.

Тэрбээр  УИХ-д гурван удаа сонгогдохдоо  тухайн үедээ Нийгмийн бодлогын байнгын хорооны дарга, Нийгмийн хамгааллын болон Эрүүл мэндийн сайдаар тус тус ажиллаж байлаа.   УИХ дахь Нийгмийн бодлого,боловсрол, соёл, шинжлэх ухааны байнгын хороо хамгийн их ачаалалтай ажилладаг бүтэц. Эндээс  гэр бүл,  хүүхэд, халамж, боловсрол  гээд нийгмийн хүрээг хамарсан бүхий л асуудал боловсруулан бэлтгэгдэн  УИХ-аар ордог.  Энэ бүхэнд тэрбээр байнгын хорооны даргын хувьд хууль, эрхзүйн орчныг сайжруулахад анхаарч, хуулийн төслийн ажлын хэсгийг ахлан ажиллаж байв.

МАН мөрийн хөтөлбөртөө мэргэжлийн Засгийн газар байгуулахаар тусгасан. Шинэ  Ерөнхий сайд Ж.Эрдэнэбат “Мэргэжлийн Засгийн газар гэдэг бол тухайн салбартаа дадлага туршлагатай, тэндээ ажиллаж туршлага хуримтлуулсан, салбараа мэддэг хүнийг ажиллуулахыг хэлнэ” гэж онцолсон.  Т.Ганди энэ Засгийн газарт Хүн амын хөгжил нийгмийн хамгааллын сайдаар ажиллах мэдлэг чадвар туршлага хуримтлуулсан нэгэн хэн ч маргахгүй биз.  

Нийгмийн хамгааллын сайдаар ажиллаж байхдаа халамж шаардсан   нийгмийн эмзэг давхрагийнханд чиглэсэн бодлогыг хэрэгжүүлж байсанд талархах хүмүүс олон.    Ялангуяа хөгжлийн бэрхшээлтэй иргэдийг  сурч боловсрох, мэргэжил олгох, цаашлаад   ажлын байраар хангахад чиглэсэн хууль  эрхзүйн орчин бүрдүүлэх чиглэлд илүүтэй анхаарч ирсэн байдаг.

Мэргэжлийн Засгийн газар бүрдүүлэхээс гадна “давхар дээл”-ийг цөөлөх бодлогыг шинэ Ерөнхий сайд Ж.Эрдэнэбат барьж байгаа. Энэ талаараа Ерөнхийлөгчид бараалхах  үедээ Засгийн газрын тэргүүн  үндсэн чиг  үүргийн  яамдаас бусад салбарт “дан дээл”-тэй сайд томилох байр суурьтай байгаагаа илэрхийлсэн.    Хүн амын хөгжил, нийгмийн хамгааллын яам үндсэн чиг үүргийн бус яам.  Энэ яаманд сайдаар томилогдох таамаглалтай байгаа  Т.Ганди ч парламентын гаднах, мэргэшсэн улстөрч.  Энэ нь МАН-ын мэргэжлийн Засгийн газар байгуулах,  Ерөнхий сайдын  “дан дээл”-тэй сайдыг томилох бодлоготой аль аль талаасаа уялдаж байгаа билээ.

Тэгээд ч өнөөдөр нийгмийн хамгааллын салбарт тулгамдсан асуудал их байна.  Нийгмийн хамгааллын чиглэлийн тулгамдсан асуудлуудыг хэрхэн шийдвэрлэх, ямар бодлого хэрэгжүүлэх талаарх өөрийн байр суурь, бодлого хөтөлбөр түүнд бий.  Бас өмнөх Засгийн газрын үед хэрэгжүүлсээр ирсэн дэвшилттэй  зүйлүүдийг уламжлал болгон үргэлжлүүлэх хэрэгжүүлж  чадна.

Улс төрд эрэгтэй хүн алсын зорилгыг тодорхойлдог бол эмэгтэйчүүд алсын зорилгоо хэрэгжүүлэх  замд нь таарах саад бэрхшээлийг урьдчилан харж, замыг нь зассаар ирсэн байдаг.  Хүн амын хөгжил, нийгмийн хамгаалал  бол тухайн улстөрчөөс мэдрэмж шаардсан салбар.  Тиймээс ч  эмэгтэй улстөрчийн  хувьд нийгмийн хамгаалал, хүний хөгжлийн салбар төдийгүй  Засгийн газрын танхимд асуудал шийдвэрлэхэд ч  туршлагатай улстөрчийн  торгон мэдрэмжээр хандана гэж   олон нийт ам сайтай байна.

Шинээр бүрдэх Засгийн газрын танхимд ажиллах сайдууд салбартайгаа танилцаж цаг алдах бус  ажлаа хүлээж аваад, бодлогоо шуурхай  хэрэгжүүлээд явах Т.Ганди шиг мэргэшсэн улстөрчид байхыг цаг үе, нийгэм шаардаж байгаа билээ.

Н.Нягт