Монголын байгаль хамгаалах иргэний хөдөлгөөнүүдийн эвслийн нэхэмжлэлтэй Петрочайна Дачин Тамсаг /Монгол/ ХХК-д холбогдох хэргийг өнгөрсөн дөрөвдүгээр сарын 17-нд анхан шатны шүүхээр байгаль орчинд учруулсан 1.3 тэрбум төгрөгийг гаргуулж, Матад сумын төсөвт олгохыг даалгах шийдвэр гаргасан билээ. Тус компани нь Дорнод аймгийн Матад сумын Буян-Өндөр багийн нутагт газрын тосны үйл ажиллагаа явуулахдаа байгаль хамгаалах, нөхөн сэргээх үүргээ бүрэн биелүүлээгүй юм. Гэвч хариуцагч тал шүүхийн шийдвэрийг зөвшөөрөхгүй давж заалдах шатны шүүхэд 15 нүүр бүхий хариу тайлбарыг гаргасан юм. Энэхүү гомдлыг нийслэлийн шүүхэд өнөөдөр 09.00 цагт хэлэлцэхээр болжээ. Уг хэргийн давж заалдах шатны хурал зургадугаар сарын 18-нд болох байсан ч Петрочайна Дачин Тамсаг компанийн итгэмжлэгдсэн төлөөлөгч буюу өмгөөлөгч солигдсон тул хавтаст хэрэгтэй бүрэн танилцаж амжаагүй байгаа учраас хурлыг хойшлуулах хүсэлт тавьснаар өнөөдөр хүртэл хойшлоод байсан билээ. Б.Чимэг
