ДНБ, 2010 оны зэрэгцүүлэх үнээр энэ оны эхний 9 сард 11365.6 тэрбум төгрөг болж, өмнөх оны мөн үеэс 180.3 тэрбум төгрөгөөр /1.6 хувь/ буурчээ.

Улирлын нөлөөллийг арилган тооцсоноор  ДНБ, 2010 оны зэрэгцүүлэх үнээр энэ оны  гуравдугаар улиралд өмнөх улирлаас 1.8 хувиар буурсан байна гэж Үндэсний статистикийн хорооноос мэдээлэв. Тус хорооноос энэ оны эхний 10 сарын нийгэм, эдийн засгийн байдлыг танилцуулсан юм.

Танилцуулгаас дурдвал өрхийн орлого 84.4 мянган төгрөгөөр буурчээ. Тодруулбал, Өрхийн нийгэм, эдийн засгийн гуравдугаар улирлын судалгаагаар нэг өрхийн сарын дундаж мөнгөн орлого 853.3 мянган төгрөг болж, өмнөх оны мөн үеэс 84.4 /9 хувь/ мянган төгрөгөөр буурсан байна.

Өрхийн орлогын бууралтад цалин хөлсний орлого 28.0 /5.5 хувь/ мянган төгрөгөөр, хөдөө аж ахуйн үйлдвэрлэлийн орлого 37.7 /37.6 хувь/ мянган төгрөгөөр багассан нь голлон нөлөөлсөн байна.

Нэг өрхийн сарын дундаж мөнгөн зарлага гуравдугаар улиралд 926.2 мянган төгрөг болж, өмнөх оны мөн үеэс 10.4 мянган төгрөгөөр буурчээ. Мөн хүүхдийн мөнгөнд өнгөрсөн сард 12.6 тэрбум төгрөг олгосон байна.

Түүнчлэн улсын нэгдсэн төсвийн зарлага, эргэж төлөх зээлийн хэмжээ орлогоосоо давж төсвийн алдагдал 2 их наяд 320.4 тэрбум төгрөгийн алдагдалтай гарчээ. ҮСХ-ноос гаргаж буй оны эхний 10 сарын мэдээллийг өнгөрсөн есдүгээр сартай харьцуулахад нэг сарын дотор 268.7 тэрбум төгрөгөөр нэмэгджээ.