Өчигдөр 18.40 цагийн үед “Глобал бевериж” ХХК-ийн УНЦ-3887 улсын дугаартай автомашин тээвэрлэж явсан 40 тонны чингэлгээ эргэлтийн үед хажуудаа явсан УНЦ-4053 улсын дугаартай суудлын автомашин дээр унагасан хэрэг гарчээ. Уг хэрэг Нийслэлийн Баянгол дүүргийн 20 дугаар хороо, “ТЭЦ-4” ТӨХК-ийн зүүн урд талын шороон авто замд гарсан байна. Ослын улмаас автомашинд зорчиж явсан 54 настай эмэгтэй Б төмөр хийцэд хавчуулагдан нас баржээ. Харин иргэн 49 настай эмэгтэй Т, 53 настай эрэгтэй Г нар хөнгөн бэртсэн байна. Тэднийг яаралтай түргэн тусламжийн 103-т хүргэн, харин нас барсан иргэний цогцсыг Шуурхай бүлэг 105-ын аврагчид гарган цагдаагийн байгууллагад хүлээлгэн өгчээ. Чингэлэг дотор ахуйн хэрэглээний 220 граммын хэмжээгээр савласан 2328 хайрцаг буюу 65184 ширхэг шингэрүүлсэн шатдаг хийтэй баллон байжээ. Ослын үеэр хадгалалт, тээвэрлэлтийн горим алдагдсанаас тухайн орчинд шингэрүүлсэн шатдаг хий алдагдсан байна. Иймд Аврах гал унтраах 26 дугаар ангийн алба хаагчид орчныг саармагжуулж, хамгаалах, болзошгүй гал түймэр гарахаас урьдчилан сэргийлэх зорилгоор усан хөшиг татаж, хөөсөөр чингэлэгийг хучсан байна. Харин баллонтой хийг зөөвөрлөх, тээвэрлэх ажлыг Аврах салбарын бүлэг хийж гүйцэтгэсэн байна.