18 жилийн өмнө Дэд бүтцийн сайд С.Зориг агсныг  хөнөөсөн хэрэг олон нийтийг цочирдуулж, хэргийн эзэн өнөө хэр тодорхойгүй байсан юм.

Эл хэрэгт Орхон аймгийн харъяат Б.Содномдаржаа, Т.Чимгээ нарыг сэжиглэж буй бөгөөд шүүх хурал нь энэ сарын 14-нд буюу лхагва гаригт болно.

 Эзэн нь олдоогүй эл хэрэгт нийтдээ 20 гаруй хүнийг сэжиглэн байцаасан байдаг.  Үндэсний аюулгүй зөвлөлөөс анхаарлаа хандуулж ирсэн дээрх хэргийг  прокурорын байгууллага "улс төрийн аллага" биш гэж үзсэн бололтой.

Тодруулбал, сэжигтэн этгээдүүдийг Эрүүгийн хуулийн 91.2.1, 91.2.4, 91.2.6, 91.2.10, 91.2.11, 91.2.13, 91.2.16 заасан гэмт хэрэгт буруутган, ял төлөвлөжээ.

Эрүүгийн хуулийн 91.2.1 шунахайн сэдэлтээр, 91.2.4 захиалгаар, 91.2.6 өөр гэмт хэргийг нуун далдлах буюу хялбарчлах зорилгоор, 91.2.10 хүнийг санаатай алах гэмт хэргийг давтан үйлдсэн, 91.2.13 нийтэд аюултай аргаар, 91.2.16 хоёр буюу түүнээс олон хүнийг гэх зүйл ангитай.

Уг нь Эрүүгийн хуульд  "Төр нийгмийн зүтгэлтний амь биед халдах" гэсэн тусдаа 81-дүгээр  зүйл заалт бий.  Энэ зүйлийн 81.1 дэх хэсэгт Улс төрийн үйл ажиллагаанд саад учруулах, Монгол Улсын Засаг төрийг бусниулан доройтуулах зорилгоор улс төр, олон нийтийн үйл ажиллагаатай нь холбогдуулан төр нийгмийн зүтгэлтнийг алсан бол арван таваас дээш хорин таван жил хүртэлх хугацаагаар хорих эсвэл цаазаар авах ял шийтгэнэ" гэж заажээ.

Ямартай ч ээдрээ төвөгтэй энэ хэргийг Сүхбаатар дүүргийн Эрүүгийн анхан шатны шүүгчид болох М.Алдар, Б.Мөнх-Эрдэнэ, С.Оюунчимэг нар болох туршлагатай шүүгч дэнслэх нь байна.