С.Зориг агсны хэргийн шүүх хурал ШШГЕГ-ын харьяа цагдан хорих 461 дүгээр ангид болж байна. С.Зориг агсны амь насыг бүрэлгэсэн хэрэгт шүүгдэгч Ц.Амгаланбаатар нарын гурван хүнийг Эрүүгийн хуулийн тусгай ангийн 91.2.1, 91.2.4, 91.2.6, 91.2.10, 91.2.11, 91.2.12, 91.2.13, 91.2.16 гэсэн зүйл заалтаар шүүж байгаа. Шүүх хурал нууцын зэрэглэлтэй тул хаалттай явагдаж байгаа юм. Тэгвэл бид шүүх хуралд ирсэн шүүгдэгч нарын ар гэрийнхэнээс зарим нэгэн зүйлийг тодрууллаа. 

Б.Содномдаржаагийн ээж Б.Жавзмаа: Бид өнөөдрийн шүүх хуралд оролцохоор Б.Содномдаржаагийн дүү, эгч нарын 10 гаруй хүн Эрдэнэтээс ирсэн. Гэвч шүүх хуралд хэнийг нь ч оруулсан. Миний хүүг ингэж хилс хэргээр хэнийг ч оруулахгүйгээр шүүж байгаад үнэхээр гомдолтой байна. Хүүг маань хилс хэргээр 1 жил 4 сар хорьж байна. Түшиг тулгуур болсон хүүг минь хорьсноос хойш эхний гурван сар огт уулзуулаагүй. Харин сүүлийн саруудад хүүтэйгээ уулзсан. Турж эцээд, сэтгэл санааны гүн дарамтанд орчихсон байна лээ. Үнэхээр гомдолтой байна. Миний хүү Т.Чимгээ хоёр нэг хүний гүтгэлгээр хилсээр л ял үүрэх гээд байгаад айж байна. Хэргийг энэ чигээр нь шийдчихгүй байлгүй дээ л гэж горьдож сууна. Миний хүү ийм хэрэг хийгээгүй юм чинь би хэрэг хүлээхгүй, хавтаст хэрэгтэй танилцахгүй гэдгээ хэлсэн байгаа. Гэвч хүчээр ял өгчих вий гэж айж байна.

Ц.Амгаланбаатарын өргөмөл эгч Н.Гансүрэн: Миний дүү бид хоёр нэг айлын өргөмөл хүүхдүүд. С.Зоригийн хэргийг гарахад дүү маань 16-хан настай байсан. Ингээд 2007 онд өөрөө хүн амны хэргээр шоронд ял эдлэх болсон. Ингэж шоронд ял эдэлж байгаа хүн ийм том хэрэгт холбогдчихсон байна гэж байх уу. Шоронд байгаа хүн ийм хэрэг үйлдсэн байж таарах уу. 

Шүүгдэгч Т.Чимгээгийн нөхөр С.Бямбасүрэн: Манай гэр бүлийн хүн хоригдоод 1,4 жил болж байна. Эмэгтэй хүний хувьд маш хүнд нөхцөлд байгаа. Энэ шүүх хурал үнэн зөвийг шийдэж, эхнэрийг маань цагаатгана гэдэгт итгэж байна. Манай эхнэрийг нэг өмгөөлөгч өмгөөлж, шүүх хуралд оролцож байгаа. Хамгийн гол нь хэрэг хийгээгүй гэмгүй хүмүүст хүчээр ял үүрүүлчих вий гэж айж байна.

Б.Энхжин