Цагдан хорих 461 дүгээр ангид С.Зоригийг хөнөөсөн хэргийн шүүх хурал хоёр дахь өдрөө үргэлжилж байна. Тэгвэл шүүх хурал дөнгөж саяхан шүүгдэгч Ц.Амгаланбаатар, Б.Содномдаржаа, Т.Чимгээ нарын мэдүүлгээр эхэллээ.

Хоёр дахь өдрөө болж буй шүүх хурлыг Ерөнхий шүүгч М.Алдар даргалж, шүүгчээр Б.Мөнх-Эрдэнэ, С.Оюунчимэг, өмгөөлөгчөөр Л.Мөнхтөр, С.Оюунцэцэг, Д.Дашдорж, Л.Энхсайхан, улсын яллагчаар Б.Батжаргал, Ж.Сандагсүрэн нар оролцож байгаа юм. Мөн онцгой байдлын хоёр шинжээч өнөөдрийн шүүх хуралд дахин оролцож байна. Тэд ямар үүрэгтэйгээр нууцын зэрэгт багтсан хэргийг шүүх хуралд суусныг  мөн л нууцалж байна.

Харин гэрчээр Г.Чулуунбат, н.Давааням гэх хоёр оролцож байна. Шүүх хурал "маш нууц"-ын зэрэглэлтэй эл хэргийн шүүх хурал хаалттай болж байгаа бөгөөд шүүх хурлын эхлэлийг хэвлэлийнхэнд мэдээлж цааш хаалттай үргэлжилж байгаа юм.

С.Зоригийн хэрэг 18 жилийн дараа дэслэгдэхээр хоёр дахь өдрөө үргэлжилж байна. Энэхүү шүүх хуралд хоёр гэрч оролцож байгаа. Тодруулбал С.Зоригийн хэргийн нууцтай холбоотой баримтыг Г.Чулуунбат гэрчлэх бол  Б.Содномдаржаагийн өмгөөлөгчийн хүсэлтээр Н.Давааням гэж хүн мөн гэрчээр оролцож байна. Н.Даваанямын хувьд Орхон аймгаас гэрчээр оролцохоор ирсэн. Тодруулбал, тус хэрэг гарсан өдөр буюу 1998 оны 10 дугаар сарын 02-ны өдөр шүүгдэгч Б.Содномдаржааг хаана байсан юу хийж байсан талаар гэрчлэх юм байна. Тэрбээр Б.Содномдаржааг цэрэгт  татагдах үед ангийн дарга нь байсан аж. 

Тэгвэл С.Зоригийн хэргийн нууцтай холбоотой баримтыг гэрчлэх Г.Чулуунбат гэж хэн бэ. Тэрбээр олон нийт  танил нэгэн биш аж. Албан бус эх сурвалжийн мэдээлж буйгаар Г.Чулуунбат нь С.Зоригийн бие төлөөлөгч нь байсан нэгэн юм байна. Тухайн үедээ талийгаач С.Зориг Ц.Элбэгдоржийн Засгийн газарт Дэд бүтцийн сайдын албыг хашиж байсан. Харин Г.Чулуунбат нь мөн л томоохон албан тушаалд очихоор яригдаж байсан нэгэн аж. Мөн үүнээс гадна Г.Чулуунбат талийгаачийн уулзалт үйлдэл бүрийг мэддэг байсан бөгөөд амиа алдахаасаа өмнө хэнтэй ямар хэргээр уулзсаныг гэрчлэх магадлалтай юм байна. Гэхдээ түүнийг хэн хөнөөснийг Г.Чулуунбат гэрчлэх боломжгүй гэнэ. Харин хэрэг гарах үед хажууд нь цорын ганц гэрч байсан нь талийгаачийн эхнэр Б.Булган. Амьд гэрчтэй тус хэрэг 18 жилийн дараа дахин сөхөгдөж шүүх хурал нь болж байхад цорын ганц гэрч болох Б.Булган оролцохгүй байгаа нь олны гайхширлыг төрүүлж байгаа юм.

Бид шүүх хурлын мэдээллийг цаг алдахгүй хүргэх болно.

Б.Энхжин