С.Зориг агсны амь насыг бүрэлгэсэн хэргийн шүүх хурал 18 жилийн дараа эдгээр өдрүүдэд дэнсэлж байна. Эл хэрэгт өнгөрсөн оноос эхлэн Ц.Амгаланбаатар, Т.Чимгээ, Б.Содномдаржаа нарын гурван хүнийг сэжигтнээр татаж цагдан хорьсон юм.

Улмаар тэднийг Эрүүгийн хуулийн тусгай ангийн  91 дүгээр зүйл ангиар яллагдагчаар татаж, 91.2.1, 91.2.4, 91.2.6, 91.2.10, 91.2.11, 91.2.12, 91.2.13, 91.2.16 гэсэн зүйл заалтаар буруутган шүүж байгаа юм. Шүүх хурал өнгөрсөн гурван өдрийн турш ШШГЕГ-ын харьяа цагдан хорих 461 дүгээр ангид болсон. Гэвч ажлын цаг дуусч, амралтын өдөр таарсан тул ирэх даваа гаригт үргэлжлүүлэн хуралдахаар болсон.

Өнгөрсөн гурван өдрийн хуралдаанаар шүүгдэгч, гэрчүүд мэдүүлгээ өгсөн. Улсын яллагч, өмгөөлөгчдийн асуусан асуултад хариулт өгсөн байна. Мөн нотлох баримтуудыг шинжилсэн байдаг. Хуралд гэрчээр Н.Давааням, Г.Чулуунбат нар оролцож буй. Н.Даваанямын хувьд Б.Содномдаржаагийн өмгөөлөгчийн хүсэлтээр Орхон аймгаас гэрчээр оролцохоор ирсэн. Тэрбээр Б.Содномдаржааг цэрэгт татагдах үед ангийн дарга нь байсан гэх мэдээлэл байна. Харин Г.Чулуунбат бол С.Зоригийн бие төлөөлөгч байсан хүн гэж байгаа юм.