Шинэ жилийн баярыг дэлхий даяар бүх хүн шашин шүтлэг, хэл соёл, яс үндэс харгалзахгүй тэмдэглэдэг. Бид бүгдээрээ л тэр нэгэн онцгой үдшийг хүлээн өөр өөрийн онцлогоор тэмдэглэхийг хичээдэг. Зарим хүмүүс  шинэ оноо хэрхэн аз жаргалтай угтана тэр ондоо бүтэн аз жаргалтай байна гэж үздэг. Бас зарим нь гэртээ, гэр бүлтэйгээ, найз нөхөдтэйгөө тэмдэглэдэг бол өөр хэсэг хүмүүс цанын бааз, үзэсгэлэнт арал, шинэ хотоор аялаж өнгөрүүлдэг байна. Тэгвэл дэлхийн усл орнууд шинэ жилийн баярыг хэрхэн тэмдэглэн өнгөрүүлдэгийг сонирхуулъя. 

Токио

Хэрэв та шинэ жилийг нэлээн эртнээс тэмдэглэж эхлэхийг хүсч байвал Токиод очиход болно. Тэнд 12-р сарын 29-өөс эхлэн шинэ жилийн баярыг тэмдэглэдэг бөгөөд нэгдүгээр сарын 4 хүртэл хамгийн урт баярын өдрүүдийг та харах болно. Гэвч жуулчдад зориулсан ихэнх газрууд хаалттай гэдгийг хэлэх хэрэгтэй. Хотын бүх ресторан баар, шөнийн клубууд хүнээр дүүрч хот тэр чигээрээ салют буудуулж, дуулан бүжиглэж байх мэт сэтгэгдэл төрнө.

Үндэсний хоол Тошикоши Соба зооглож, Жуяа Но Канэ хэмээх дууг дуулах нь Япон маягийн шинэ жил тэмдэглэлт юм. Энэхүү хоолыг урт удаан наслахыг бэлгэдэн урт хэлбэртэй хийж идэхийг эрхэмлэдэг байна. Бүх сүмүүд 108 удаа хонхоо цохиж шинэ оноо угтана. Империаль Палас нэгдүгээр сарын 1-нд олон нийтэд зориулж 2 өдөр үүд хаалгаа нээдэг.

Сидней

Дэлхий дээр хамгийн түрүүнд энэ хотод шинэ жил айлчлан ирдэг. Энд та алдарт тэнгэрт дүрэлзэх галын наадмыг үзэж гайхан бишрэх болно.

Он солигдох мөчийг хүлээсэн сая гаран хүмүүсийн халуун дулаан баярын уур амьсгал эргээр дүүрч, хамгийн гайхалтай эргийн паартинуудаар зочилж болно. Гэхдээ та хагас ханцуйтай цамц богино өмд өмсөхөө мартаж болохгүй. Яагаад гэвэл энд яг энэ үеэр зуны дунд сар байдаг.

Лондон

Та энд ч мөн гайхалтай салют болон гэрлийн наадмыг үзнэ. Хот даяар барилгын дээвэр дээр байрлуулсан мянга мянган бэлтгэл ажлын үр дүнд энэ гайхалтай шоу болдог юм.

Та Вестминистерийн гүүрний ойролцоогоос энэхүү галын наадмыг шөнө дунд Биг Бенийн хонх цохих үеэр сайн харж чадна. Хэрвээ та театрт дурлагч бол Лондонгийн театрууд таныг уйдаахгүй.

Барселона

Шинэ жилийн баярын Испани хэлбэрийг Noche Vieja гэдэг. Салса бүжгээс эхлээд фламенко, рок хамтлагийн үзүүлбэрүүд, паари бол баярын голлох үйл явдлууд юм.

Шөнө дунд хонх 12 удаа цохих үеэр хүн болгон цохилтын дууны дагуу 12 усан үзэм иддэг. Энэ уламжлал эрт дээр үеэс уламжлан иржээ. Хэрэв та энд нэгдүгээр сарын 5 хүртэл байх бол Cabalgata de los Reyes Magos буюу Гурван Хааны Парад хэмээх баярын жагсаалыг үзнэ.

Парис

Энэ хотод та Боннэ Аннии хэмээн олон хүний хэлэхийг сонсоно. Галын наадмууд, клуб ресторануудын хөгжим цэнгээнээс гадна Елисейн талбай дээр тэмдэглэдэг дарсны баяр хамгийн гол үйл явдал юм.

Орой есөн цагаас эхлэх энэ баяр он солигдох мөч хүртэл үргэлжилж хундагатай дарстай хамт та Эйфелийн цамхаг хэрхэн гэрлэн шоу үзүүлэхийг харна.

Венец

Ла Феста ди Сан Силвестро буюу хуучин оны хамгийн сүүлийн өдрийн баяр, II Каподанно буюу шинэ оны эхний өдөр тэмдэглэдэг баяр бол Венец маягийн шинэ жилийн баяр юм. Мөн шөнө дундын үнсэлт хамгийн сонирхолтой энэ хотын онцлог юм. Хайртай хосууд шинэ оныг угтаж үнсэлцэх ёстой.

Эндхийн ресторануудад гайхамшигтай Итали хоолнуудаар тавагаа дүүргэн, дарсаар даруулах боломжтой. Шөнө дундаас эхлэх шоунууд нар мандтал үргэлжилнэ.