Өчигдөр УИХ-ын гишүүн асан Б.Гарамгайбаатарыг сэжигтнээр татан цагдан хорих шийдвэр гарч, ШШГЕГ-ын харьяа цагдан хорих 461 дүгээр анги руу ачсан юм.

Хөгжлийн банкнаас 43,6 тэрбум төгрөгийг гаргуулж авахаас өмнө уг замын 38 хувийг хятад компани засчихсан байсан аж.

Эх сурвалжийн мэдээлж байгаагаар УИХ-ын гишүүн асан Б.Гарамгайбаатарыг сэжигтнээр татаж, хүү Г.Тэнгис, төрсөн дүү Б.Оюунцэцэг нарыг нь АТГ-аас дуудан байцааж байгаа аж. Г.Тэнгис нь "Монроуд" компанийн захиралаар ажилладаг бол, дүү Б.Оюунцэцэг нь тус компанийн нягтлан бодогч юм байна.

Тэднийг шалгах болсон гол асуудал нь Халзан бүргэдэй, Солонготын давааны чиглэлийн замын гүйцэтгэл 38 орчим хувьтай байхад тухайн газарт дахин шинээр зам тавих ойлголтыг Засгийн газарт төрүүлж тогтоол батлуулсан явдал гэнэ. Улмаар 43.6 тэрбум төгрөгийг “Монроуд” компанид шууд шилжүүлж өгчээ.

Гэтэл Хөгжлийн банкнаас 43,6 тэрбум төгрөгийг гаргуулж авахаас өмнө уг замын 38 хувийг хятад компани засчихсан байсан аж.

Энэ талаар АТГ-аас ямар мэдээлэл өгч байсныг эргэн саная.

АТГ-ын Мөрдөн шалгах хэлтсийн дарга Э.Амарбат: Хөгжлийн банкны албан тушаалтнууд Халзан бүргэдээс Солонготын даваа чиглэлийн 100 км авто замын гүйцэтгэл нь нийтдээ 38 орчим хувьтай байхад уг газарт шинээр зам тавихаар Засгийн газарт тогтоол оруулж батлуулсан. Ингээд нэмээд нийтдээ 46.3 тэрбум төгрөгийг гаргуулж аваад "Монроуд” гэх компанид шууд шилжүүлэн өгсөн байгаа юм. /2015.5сар/

Ийнхүү 2015 оноос хойш түдгэлзээд байсан "Монроуд” компанийн хэргийг АТГ-аас сэргээн шалгаж улмаар тус компанийг үүсгэн байгуулагч Б.Гарамгайбаатарыг шалгаж эхэлсэн бөгөөд Халзан бүргэдээс Солонготын даваа чиглэлийн 100 км замыг 2013 онд шинээр барих замын жагсаалтад хууль бусаар оруулсан хэрэг, тус замын 38 хувийг зассан байхад дахин мөнгө авсан асуудлаар Эрүүгийн хуулийн тусгай ангийн 263.2, 150.3-т зааснаар эрүүгийн хэрэг үүсгээд байгаа аж.

УИХ-ын гишүүн асан Б.Гарамгайбаатарын "Монроуд" юу хийв?!

Архангай аймгийн Тариат сумын нутаг Халзан бүргэдэйгээс Солонготын даваа хүртэлх 100 км хатуу хучилттай зам засах ажил 2008 оноос эхэлсэн бөгөөд зам засварын ажлыг БНХАУ-ын “Зам барилгын II анги” компани гүйцэтгэхээр 2008 онд тендерт шалгарч ажлаа эхэлжээ. Замын төсөвт өртөг 20 тэрбум төгрөг байхаар тухайн үед гэрээ байгуулсан аж. Гүйцэтгэгч компани замын 38 хувийг зассаны дараа санхүүгийн хүндрэл, инфляциас шалтгаалж ажлаа гүйцэтгэх боломжгүй болж гэрээгээ цуцалжээ.

БНХАУ-ын “Зам барилгын II анги”-ийн дутуу орхисон замын ажлыг үргэлжлүүлэн гүйцэтгэх асуудлыг УИХ хэлэлцэж 2012 оны төсөвт суулгажээ. Үүний дагуу 2012 оны дөрөвдүгээр сарын 27-нд Зам, тээвэр, барилга, хот байгуулалтын яамнаас Халзан бүргэдэй-Солонготын даваа чиглэлийн хатуу хучилттай авто замын барилгын ажлын тендер шалгаруулахад тендерт “Монроуд” компани материалаа ирүүлж 37.2 тэрбум төгрөгөөр замын ажлыг гүйцэтгэх боломжтойгоо мэдэгдсэн байна.

Тиймээс тендерт шалгарсан “Монроуд” компанийн материалыг Засгийн газрын хуралдаанаараа оруулж, Засгийн газар 2012 оны 110 дугаар тогтоолоо гаргаж Хөгжлийн банкны санхүүжилтээр Халзан бүргэдэй-Солонготын даваа чиглэлийн замын үлдсэн хэсгийг “Монроуд” компаниар гүйцэтгүүлэхээр болжээ. Уг тогтоолоор замын төсөвт өртөг нь 37 тэрбум 231 сая 300 мянган төгрөг байх бөгөөд бүгдийг нь Хөгжлийн банк санхүүжүүлэх бөгөөд 2012 онд гурав, 2013 онд 32 тэрбум 369.7 сая, дараа жил нь нэг тэрбум 800 сая төгрөгийн санхүүжилт хийхээр болжээ.

Гэтэл жилийн дараа буюу 2013 онд Хөгжлийн банк санхүүжилт хийх төслийнхөө талаар Эдийн засгийн хөгжлийн яаманд танилцуулга хийх үеэр тус зам засварын ажлын гүйцэтгэгч компани дээрх ажлыг анх тогтсон үнээрээ гүйцэтгэх боломжгүй гэж байгаа гэх асуудлыг ярьж эхэлжээ. Ингээд л 38 хувийн гүйцэтгэлтэй замыг дахин шинээр засах төсөл эрчээ авч улмаар 43.6 тэрбум төгрөгийг гүйцэтгэгч болох “Монроуд” компанид шилжүүлсэн нь асуудал үүсгэж өдгөө УИХ-ын гишүүн Б.Гарамгайбаатар хоригдоод байгаа аж.