"Лондон 2012" олимп тун удахгүй болох гэж байгаатай холбоотойгоор зарим нэг өөрчлөлт оржээ. Үүний тухай мэдээллийг хүргэж байна.

    “Лондон-2012” олимпийг Зохион байгуулах хорооноос хүмүүсийн аюулгүй байдлыг хангах, тээврийн хэрэгслээс хоцроохгүй байлгах үүднээс олимпийн нээлтийн ёслолыг 30 минутаар хасахаар шийдвэрлэснээ мэдэгджээ.  Цэнгэлдэх хүрээлэнд цугларсан хэдэн мянган үзэгч нээлт дууссаны дараа “ордон”-оос гарахын тулд шахцалдан, тээврийн хэрэгсэлд амжиж суухын төлөө эмх замбараагүй байдал үүсгэхээс болгоомжлон хагас цагаар товчилсон байна. Тиймээс дугуйтай акробатын үзүүлбэр жагсаалтаас хасагджээ.
    Лондоны олимпийн нээлтийн ёслолд Армений тугийг 83 настай, ЗХУ-ын нэрт гимнастикч асан Альберт Азарян залахаар болжээ. “Манай ҮОХ XX зууны Армений шилдэг тамирчныг сонгож авсан нь тохиолдлын хэрэг биш” хэмээн албаны хүмүүс мэдэгдсэн байна. Цагтаа цахилж явсан энэ эр цагаригт дүүжин- гийн төрөлд өндөр амжилт гаргаж байсан юм. 1952-1962 оны ЗХУ- ын АШТ-д Азарян 11 удаа түрүүлснээс цагаригт наймантаа алтан медаль зүүжээ. 1954, 1958 оны дэлхийн аварга тэрбээр 1956, 1960 оны олимпийн аварга юм. Зодог тайлсныхаа дараа нэрт гимнастикч Ереван дахь гимнастикийн сургуулийг удирдаж, улмаар олон улсын шүүгч болсон. Түүний хүү Эдуард “Москва- 80”-ын гимнастикийн багийн төрөлд манлайлсан түүхтэй. Өдгөө Азарян Армений гимнастикийн холбоог тэргүүлдэг аж.
    Лондоны олимпод оролцох ОХУ-ын теннисний шигшээ багийн бүрэлдэхүүн тодорлоо. Эрэгтэйчүүдийн ганцаарчилсан тоглолтод Михаил Южный, Николай Давыденко, Александр Богомолов, Дмитрий Турсунов нар тоглох бөгөөд хос тоглолтод Южный Давыденко, Богомолов Турсунов нар оролцох юм. Эмэгтэйчүүдийн ганцаарчилсан тоглолтод Мария Шарапова, Вера Звонарева, Мария Кириленко, Надежда Петрова нар хүч сорино. Хос төрөлд  Кириленко, Петрова, Веснина Макарова нар өрсөлдөх юм байна. Харин Свитлана Кузнецоваг нөөцөд үлдээжээ. Бэртэлтэй байгаа Звонареваг тоглох боломжгүй болбол Кузнецова орлох аж. Дашрамд дурдахад Мария Шарапова нээлтийн ёслолд эх орныхоо тугийг залах билээ.
    Германы шигшээ багийнхан хамгийн хамгийнаа шалгаруул- жээ. Хамгийн намхан тамирчнаар тодорсон Оксана Чусовитина 143 см өндөр, 43 кг жинтэй гимнастикч бөгөөд зургаа дахь олимпдоо оролцохоор зэхэж буй нь энэ. Тэрбээр Барселоны олимпоос багийн алт, “Бээжин-2008”-аас мөнгөн медаль зүүж байжээ. Тус улсын хамгийн залуу нь 15-тай гимнастикч Янин Бергер бол их жинтэй нь хүндийг өргөгч Матиас Штайнер (145 кг), өндөр нь волейболчин Маркус Бёме (2.11 см) нар юм.
    Америкийн гүйлтийн нэрт тамирчин Майкл Жонсон ӨАБНУ- ын гүйгч Оскар Писториусыг энгийн тамирчидтай өрсөлдөх ёсгүй хэмээн үзэж байна. “Би Оскарыг сайн мэднэ. Тэр сайн тамирчин боловч хиймэл хөлөөрөө яаж энгийн тамирчидтай тэмцэх юм бэ” гэж ярьжээ. Параолимпийн гурван удаагийн аварга Писториус Лондоны замд 4x400 метрийн буухиа гүйлтэд оролцохоор зэхэж буй билээ.
    “Лондон-2012” олимпийг зохион байгуулагчид энэ долоо хоногт 200 мянган тасалбар худалдаанд гаргалаа. Тэд ийм хэмжээний билет борлуулалтад гаргахаар урьдчилан төлөвлөөгүй байсан нь сонирхолтой. Эдгээрийн 50 мянга нь хөнгөн атлетик, зүлэгний хоккей, элсний волейболынх аж. Үнийн хувьд нээлт, хаалтын ажиллагааны тасалбар хамгийн өндөр ханштай.

Д.Ундрах 24tsag.mn