Өмнөговь аймагт айлууд үерт автжээ

2012-7-20

Өмнөговь аймагт аагим халуун нар шатаж, долдугаар сар гарсаар нэг дусал ч бороо оролгүй сар дундаа орсон билээ. Гэтэл өчигдөр 15.00 цагийн орчимд 20 минутын бороо орж, үер болжээ. Гэнэтийн сул ус үерийн даланг сэт даван гудамж талбайгаар сагаж, хуучин нисэх, Хан-Уул орчмын замын ус зайлуулах хоолой байхгүйгээс хоригдсон ус буцан эргэж, гэр хорооллын айлуудыг усанд автуулсан байна. Ер нь Даланзадгад хотод ус зайлуулах хоолойг шаардлагатай газруудад хийгээгүйн дээр газар олголт эмх замбараагүй, хяналтгүй байгаа нь засмал замд тулгаад барьсан хашаа гэрүүд үерийн усанд эн тэргүүнд автах шалтгаан болжээ.

Суурь муутай байшин усанд суун нурж, гэртэй айлуудын хогшил хөрөнгө усанд хөвж, цахилгаанаас гал авалцсан байна. Тэдний дотор нялх нойтон хүүхэд, жирэмсэн эмэгтэйчүүд олон байсан нь ажлын хэсгийнхнийг нэлээд сандаргасан аж. Усанд автсан айлуудыг одоогоор өндөрлөг дэнжид зөөн нүүлгэх арга хэмжээг аваад байна. Юутай ч үргэлжлэн ойрын өдрүүдэд дуу цахилгаантай бороо орох тул үерт өртөж болзошгүй айл өрхүүд нүүх хэрэгтэйг анхааруулж байна.

24tsag.mn

АНХААРУУЛГА: Та сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээ зөрчсөн сэтгэгдэлийг админ устгах эрхтэй.