Өнгөрсөн тавдугаар сарын 23-нд Дорнод аймгийн Баяндун суманд ой хээрийн түймэр унтрааж яваад галд өртөж, бүх биенийх нь 60% нь галд түлэгдсэн А.Болорсүхийг Монгол эмч нар амьдрах найдвар 40 хувьтай гэж байсан. Харин түүнийг ОБЕГ-аас Солонгос улс руу эмчилгээнд явуулсанаар түүний амьдрах найдвар 97.4 хувь болж өөрчлөгдсөн байна. Түүнийг Сөүл хотын Халлим их сургуулийн Түлэнхийн нөхөн сэргээх төвийн эмч Чу Юнг Согийн баг хүлээн авч, гурван удаа хагалгаанд оруулжээ. 2, 3 дахь хагалгааг гоо сайхны мэс заслын эмч нартай хамт хийсэн байна. Ингэснээр шилжүүлэн суулгасан арьсны 80 хувь нь нөхөн сэргээгдсэн аж. Эмчлэгч эмч Чу Юнг Со “Тэрээр хоолондоо сайжирч, бие нь илт сайжирч байгаа ч тэрээр гадаад төрхөндөө их санаа зовж байгаа. Тиймээс бид А.Болорсүхийн нүүрийг хэвийн болгохоор бүх хүч чадлаа дайчлан ажиллаж байна. Удахгүй дөрөв дэх хагалгааг хийнэ” гэжээ.
Б.Чимэг
