Олимпийн наадмын жүдо бөхийн эмэгтэйчүүдийн хамгийн хөнгөн жин болох 48 кг-д зодоглох ОУХМ М.Уранцэцэг эхний барилдаанд хийлж, хоёрдугаар тойрогт Казахстаны бөх Александа Подрядоватай барилдахаар сугалаа таарчээ. Тус жинд 19 жүдоч барилдана.

Лондонгийн олимпийн наадмын эмэгтэйчүүдийн 52 кг-ын жинд 23 жүдоч хүч үзнэ. Энэ жинд өрсөлдөх Монгол Улсын Гавьяат тамирчин М.Бундмаа жингийн тамирчдаа манлайлах бөгөөд эхний тойрогт Гаити улсын тамирчин Линоуси Десравинтай, ялбал Кубын тамирчин Янет Бермой Акостатай барилдахаар болсон байна.

Олимпийн наадмын жүдо бөхийн эмэгтэйчүүдийн 57 кг-ын жинд ОУХМ Д.Сумъяа хүч үзнэ. Сугалаа ёсоор тэрбээр эхний тойрогт БНСУ-тай шилдэг жүдоч Ким Жан Дитай, ялсан тохиолдолд Италийн бөх Жулия Квинтаваллтай барилдах юм. 57 кг-ын жинд 25 бөх барилдах юм байна.

Лондонгийн олимпийн наадмын жүдо бөхийн мэгтэйчүүдийн 63 кг-ын жингийн тухайд 24 жүдоч өрсөлдөнө. Тус жинд эх орноо төлөөлөх ОУХМ Ц.Мөнхзаяа Палау улсын тамирчин Женнифер Энсонтой, ялбал Финляндын Йоханна Илинентэй барилдахаар сугалаа таараад байна.

Лондонгийн олимпийн наадмын эмэгтэйчүүдийн -78 кг-ын жинд эх орноо төлөөлөн өрсөлдөх ОУХМ П.Лхамдэгд эхний тойрогт хийлж, хоёрдугаар тойргийн барилдаанд Их Британийн Жемма Гиббонс, Португалийн Яхима Рамирез нартай ялсантай хүч үзэх юм. Энэ жинд 21 жүдоч өрсөлдөх ажээ.