Дэлхийн цэргийн спортын холбооны 2017 онд зохион байгуулах уралдаан тэмцээний календарчилсан төлөвлөгөөний дагуу энэ сарын 8-9-ний өдрүүдэд Монгол Улсын нийслэл Улаанбаатар хотноо “Зүүн Азийн жүдо бөхийн аварга” шалгаруулах анхдугаар нээлттэй тэмцээн зохион байгуулагдах гэж байна. Тэмцээнд Монгол Улс, ОХУ, БНХАУ, Казакстан, БНСУ, БНАСАУ, Вьетнам улс зэрэг нийт 7 орны 100 гаруй тамирчин, дасгалжуулагч, 30 орчим албаны хүмүүс оролцох юм. Монгол Улс зохион байгуулагч орны хувьд эрэгтэй эмэгтэй 2 баг бэлтгэн оролцуулахаар бэлтгэл, сургуулилтаа хангажээ.

Монгол Улсад анх удаа зохион байгуулагдаж буй энэхүү тэмцээнд Дэлхийн аварга шалгаруулах тэмцээний медальтан, цэргийн Дэлхийн аварга шалгаруулах тэмцээний медальтангууд оролцож байгаагаас гадна Дэлхийн цэргийн холбооны ерөнхийлөгч Абдулхакеем Алшино өөрийн биеэр оролцож байгаа нь тэмцээний нэр хүнд, ач холбогдолыг өндөрт өргөж байгаагийн зэрэгцээ манай оронд анх удаа зохион байгуулагдаж байгаагаараа онцлог юм. 

Дэлхийн цэргийн спортын холбоо /CISM/ нь Дэлхийн II дайны дараа үүсэн байгуулагдсан, 136 орныг эгнээндээ нэгтгэсэн улс орнуудын Зэвсэгт хүчин, цэргийн алба хаагчдын нөхөрлөл, харилцан итгэлцлэлийг бэхжүүлэх, спортоор дамжуулан улс орны найрамдлыг зузаатгах, энхтайвныг тогтоох зорилготой “Friendship through Sport” уриан дор үйл ажиллагаагаа явуулдаг олон улсын байгууллага юм. Монгол Улс Дэлхийн цэргийн спортын холбоо /CISM/-нд 1992 онд гишүүнээр элссэн хэдий ч төсөв санхүүгийн хүндрэлтэй байдлаас түр завсарлаж байгаад 2014 оноос гишүүнчлэлээ сэргээснээс хойш идэвхтэй үйл ажиллагаа явуулж байна. Зэвсэгт хүчний “Алдар” спорт хороо Дэлхийн цэргийн спортын холбоо /CISM/-ноос зохион байгуулсан тэмцээн, уралдаан, арга хэмжээнд амжилттай оролцож өндөр амжилтуудыг гаргаж ирсэн.

Тухайлбал, 2015 онд БНСУ-ын Мунгён хотноо зохион байгуулагдсан VI их наадамд Монгол Улсаа төлөөлөн оролцсон Зэвсэгт хүчний “Алдар” спорт хорооны баг тамирчид спортын 8 төрлөөр оролцож 6 алтан медаль, 12 мөнгөн медаль, 6 хүрэл медаль хүртэж,Дэлхийн 117 орны баг тамирчдаас багийн дүнгээр 16 дугаар байрт шалгарсан. 2015 онд АНУ-д зохион байгуулагдсан Дэлхийн цэргийн спортын холбооны чөлөөт бөхийн дэлхийн аварга шалгаруулах тэмцээнд 4 алтан медаль хүртэж, эрэгтэй баг нэгдүгээр байр, эмэгтэй баг хоёрдугаар байр эзэлсэн, 2016 оны Катар улсад зохиогдсон буудлагын тэмцээн, Швейцарь улсад зохион байгуулагдсан жүдо бөхийн дэлхийн аварга шалгаруулах тэмцээнд амжилттай оролцож 4 алт, 2 хүрэл медаль хүртэж, эрэгтэй багийн барилдаанд хүрэл медаль хүртсэн амжилтыг тус тус үзүүлжээ.