Монголын гурван тамирчин өнөөдөр олимпийн наадмын дэвжээнд гарах гэж бэлтгэлээ базааж байна. Монголчууд нутагтаа сэтгэл догдлон хүлээж байгаа бол тамирчид маань ч тэнд сэтгэл санааны бэлтгэл сайтай байгаа бололтой. Монгол улсын хөдөлмөрийн баатар Х.Цагаанбаатар гэхэд өнөөдөр 14,30 цагт эхний учраатайгаа барилдана. Тэрбээр эхний тойрогт хийлж, хоёрдугаар тойрогт Тайваний бөх Ту Кай Вентэй, ялбал дараагийн барилдаанаа Австрали болон Их Британийн бөхчүүдийн ялсантай нь хийх юм.
    Харин манай олимпийн найдвар гэгдэж байгаа баатар тамирчин Х.Цагаанбаатар энэ жил өөртөө тун итгэлтэй байна. Тэрбээр өчигдөр өөрийн твиттер хуудасдаа “Гадны тамирчид бэлтгэл их сайтай байгаа нь харагдаж байна. Алаад өгнө өө” гэж бичжээ. Үүнээс үзвэл түүний бэлтгэл хангагдсан, ялах боломж бий гэж их л өөдрөг байна. Бас өрсөлдөгч нараа ч багагүй судалсан бололтой. Х.Цагаанбаатар олимпийн нээлтийн өдөр "Монголынхоо шороотой, нутгийн минь үнэртэй алтыг авахын төлөө бид бүх чадлаа дайчилна" хэмээж байсан юм.

   Гэхдээ Х.Цагаанбаатар твиттер хуудасдаа ингэж бичиж суух боломж байгаа эсэхэд эргэлзэж зарим хүн өмнөөс нь өөр хүн бичиж байгаа гэх нь байна. Учир нь ийм чухал тэмцээний үеэр дасгалжуулагч нар тамирчдыг твиттерт “жиргэж” суух зав олгодоггүй, байнга харгалзаж байдаг билээ. Ямартаа ч өнөөдөр Тайваны бөхтэй олимпийн тэмцээнийг эхлүүлэх Х.Цагаанбаатартаа амжилт хүсье. Монголчууд бүгдээрээ 14,30 цагт болох тэмцээнийг дээлийн захыг нь мушгин үзэцгээе.