Эртнээс Монголчууд төрийн өндөрлөгүүдийг дагаж бөх төрдөг гэж ярьдаг байжээ.  Өөрөөр хэлбэл сайн улс төрчдийг сайн бөх дагадаг гэсэн эрт үеийн домог өнөө хүртэл ам дамжин хадгалагдаж ирж.
    Эртнээс Монголчууд төрийн өндөрлөгүүдийг дагаж бөх төрдөг гэж ярьдаг байжээ.  Өөрөөр хэлбэл сайн улс төрчдийг сайн бөх дагадаг гэсэн эрт үеийн домог өнөө хүртэл ам дамжин хадгалагдаж ирж.
    Эрт үеийн биш орчин үеийн жишээгээр ч энэ домог батлагддаг. Ю.Цэдэнбал даргын үед Увсаас Х.Баянмөнх босоо байлаа. Самбуу даргын үед Төв аймгаас Ж.Мөнхбат, Д.Хадбаатар хоёр төрж гарсан. Н.Багабандийн үед Завханаас Ц.Цэрэнпунцаг тодорсон бол Н.Энхбаярын төр тэргүүлэх үед Г.Өсөхбаяр аварга болсон. Н.Алтанхуягийг Ерөнхий сайд болох чимээнээр нутгийнх нь хүүхэд түрүүлж арслан төрсөн гээд жишээ татаад ярих зүйл их бий.
    Олимпийн дэвжээнд ч, тив дэлхийд ч бөхчүүд төрийнхөө тэргүүнүүдийг дагаж, аваргалдаг гэсэн яриа ч бий. Өөрөөр хэлбэл эрт үеийн домгоор бол сайн төрийн тэргүүнүүд улсаа даадаг аж. Төрийнхөө ноён нуруу болж, улс орныхоо хөгжлийг, хүн ардынхаа амьдралыг цаад утгаараа авч явдаг гэж зарим хүмүүс сүсэглэдэг. Тэгээд ч зарим хүнийг төр тэргүүлэхэд эдийн засаг өсч, ард түмний амьжиргаа дээшилдэг бол зарим нэгнийг төр тэргүүлээд эхлэхээр ган, зуд нүүрлэж байгаль дэлхий ч өгөөжөө өгөхөө больдог. Тиймээс энэ бүхэн цааш утгаараа ямар нэгэн учир жанцантай байж мэднэ.
    2008 оны Бээжингийн олимп Монголчуудын хувьд оргил үе байлаа. Тухайн үед Н.Энхбаяр, С.Баяр төрийг тэргүүлж байсан. Тэгэхэд Монголчууд хоёр алт, хоёр мөнгө олимпиос туучихсан. Монгол даяараа баярлаж байсан. Зам талбай, гудамж хөөр, баяраар бялхаж байлаа. Замын хөдөлгөөний дүрмийг мөрдөж байсан зорчигчид ховор. Тэднийг замын цагдаа торгож загнаагүй. Зорчигчид ч бие биедээ хачин элгэмсүү хандаж байсан. Ямар сайндаа Н.Энхбаяр, С.Баяр тэргүүтэй дарга нар ард түмнийхээ өмнө согтуу, хөлчүү гарч ирж орилолдоод бөөн л юм болсон доо. Хожим дарга нар маань энэ үйлдлээсээ болж бага зэрэг шүүмжлүүлсэн. Н.Энхбаярыг бүр ээж нь загнаж туйлаад бөөн юм болсон гэж хожим нь ярьсан удаатай. Тэгсэн ч гэсэн ард түмэн тэдний энэ үйдлийг тэгтлээ буруутгаагүй. Харин ч зөв ш тэй, хүн л юм чинь гэх хүн цөөнгүй байлаа. Одоо тэдний согтуу, хөлчүү гараа өргөөд орилсон зургууд интернетээр дүүрэн бий л дээ. Тэгэхэд ерөнхийлөгч Н.Энхбаяр шар хаданд байдаг Э.Бадар-Ууганы аавынд очиж алтын төлөөх тоглолтыг үзэж байлаа. Монголчууд бид дөрвөн жилийн өмнө төрийнхээ тэргүүнтэй хамт ингэж баярлан цэнгэж байлаа даа.
    Харин энэ жил ингэж баярлан цэнгэх болов уу? Ерөнхийлөгч маань аль нэгэн тамирчны аав, ээжийнд оччихоод та бүхэнтэйгээ хамт шүү гээд сууж байх болов уу? Гудамжаар залуус машинхаа цонхоор цээжээ гаргачихаад төрийнхөө далбааг намируулаад давхих болов уу? гэдэг ирэх өдрүүдэд тодорхой болно.
Энэхүү баярлан цэнгэх, бахархан шагширах ажиллагаа эртний домгоор бол Ерөнхийлөгч Ц.Элбэгдорж, УИХ-ын дарга З.Энхболд, Ерөнхий сайд болох Н.Алтанхуяг нарын ноён нуруу, аз хиймориос ихээхэн шалтгаалах бололтой.  Тэднийг төрийн тэргүүн байх үед Монголын тамирчид маань Лондонгийн тэнгэрт төрийнхөө далбааг мандуулж чадах болов уу? Хөгшин Европ 800 жилийн өмнө Монгол морины төвөргөөнөөр сэрж байсан бол харин одоо монгол төрийн дууллаар сэрэх болов уу гэдэгийг бид бүгдээрээ харж байна.
    Төрөө дээдэлж, төрийнхөө тэргүүнүүдийг хүндэтгэдэг Монголчууд энэ удаа ч гэсэн төрөө сүсэглэж, Лондонгийн сурагийг өдөр бүр хүлээж суух ажилтай боллоо. Тамирчдыг маань төрийн тэргүүнүүдийн ноён нуруу, аз хийморь яаж дааж, ивээхийг харах л үлдлээ дээ.