"Лондон 2012" зуны олимпийн наадамд жүдо бөхийн 73 кг-ын жинд хүрэл медалийн төлөө зодоглосон ОУХМ С.Ням-Очир энэ олимпийн анхны медалийг эх орондоо авчирч, олимпийн хүрэл медаль авах боллоо. Тэрбээр дэлхийн аваргын хошой мөнгөн медальт Голландын бөх Декс Эльмонттой барилдсан. Энэ барилдаанд С.Ням-Очир юүко үнэлгээгээр өрсөлдөгчөө ялсан юм. Ингэж Лондонгийн олимпийн Монголын анхны хүрэл медалийг С.Ням-Очир авчирч Монгол медалийн жагсаалтанд 23-р байранд бичигдлээ.  
   Тэрбээр 2009 оны “Универсиад” наадмын хүрэл, мөн оны Азийн аварга шалгаруулах тэмцээний хүрэл, “Дэлхийн цом”, “Мастеруудын цуврал”, “Гран-при”, “Их дуулга” гээд Олон улсын жүдо бөхийн холбооны цуврал тэмцээнүүдээс нийт дөрвөн алт, нэг мөнгө, зургаан хүрэл медаль хүртэж байсан. Харин 2012 оны олимпийн наадмын эхний тойрогт гоц мөргөж, дараагийн тойрогт Германы тамирчин Кристофер Воелкийг вазари, юүко үнэлгээгээр ялсан юм. Мөн улмаар Украйны бөх Владимир Сорокаг юүко үнэлгээгээр ялсан. Харин ч хэсгийн аваргын төлөө барилдаанд ОХУ-ын жүдоч Мансур Исаевт цэвэр ялагдсан билээ. Гэсэн хэдий ч торгуулийн барилдаанд  АНУ-ын жүдоч Николас Делпополог юүко үнэлгээгээр ялснаар дахин медалийн төлөө барилдах эрхтэй болсон. Тэрбээр ийнхүү 26 настайдаа Монголын 20 дахь медаль, 11 дэх хүрэл медалийг авчирлаа. Булган сүүлтэй байх болтугай!

Ялалтын мөч !!!