МАХН-ын дарга Н.Энхбаярын хувь заяа өнөөдөр шийдэгдэх гэж байна. Түүнийг долоон тэрбум авилгалын хэргээр Сүхбаатар дүүргийн Эрүүгийн танхимд өнөөдөр 10.00 цагаас шүүхээр болсон.
    МАХН-ын дарга Н.Энхбаярын хувь заяа өнөөдөр шийдэгдэх гэж байна. Түүнийг долоон тэрбум авилгалын хэргээр Сүхбаатар дүүргийн Эрүүгийн танхимд өнөөдөр 10.00 цагаас шүүхээр болсон. Өмнө нь Н.Энхбаяр “өмгөөлөгч тактик” ашигласаар шүүх хурлыг таван удаа хойшлуулсан. Харин эх сурвалжийн мэдээлснээр, өнөөдөр Н.Энхбаяр шүүх хурлыг өмгөөлөгчөө ашиглан хойшлуулахаар үзвэл түүнийг цагдаагийн хурандаа О.Зоригт шиг өөрийгөө өмгөөл хэмээн шүүх хуралд оруулах гэнэ. Тэгэхээр өнөөдөр товлогдсон хуралд Н.Энхбаяр “өмгөөлөгч тактик” ашиглаж чадахгүй бололтой. Гэхдээ Н.Энхбаярыг овжин зан гаргаж, ямар нэг аргаар шүүх хурлыг хойшлуулах бий хэмээн харж байгаа.
    Хуулийнхан сонгуулийн өмнөхөн түүнийг яллахаар улайрч байсан ч одоо ийнхүү хойшилсоор байгаа нь шинэ Засгийн газар байгуулагдаагүй хүлээгдэж байгаатай холбоотой хэмээн иргэд үзэж буй. Учир нь олонх болж чадаагүй АН-ынхан “МАХН-МҮАН”-ын “Шударга ёс” эвслийг сонгож, Засгийн газар байгуулахаар болсон. Тэдний шийдвэр ч “Шударга ёс” эвслийнхэнд ашигтайгаар эргэж, тэд саналыг дуртайяа хүлээн авсан.
    Ялангуяа тус эвслийн дарга Н.Энхбаярт бүр ашигтайгаар эргэсэн билээ. Мөн Н.Энхбаярын нэр дор УИХ-ын гишүүн гэх эрхэм алдрыг зүүсэн хэдэн нөхдөд ч ашигтайгаар эргэсэн. Н.Энхбаярын далбаан дор сонгогдсон тэд мэдээж түүний ачийг одоохондоо мартах болоогүй. Тиймдээ ч “МАХН-МҮАН”-ын “Шударга ёс” эвслийнхэн даргыгаа яллуулахгүй, хорихгүй байх ёстой хэмээн үзэж эхэлжээ. Энэ талаараа ч тус эвслийнхэн өчигдөр ярилцсан хэмээн эх сурвалж мэдээлэв.
    АН-тай хамтран Засгийн газар байгуулахаар шийдэлд хүрсэн “Шударга ёс” эвслийнхэн Засгийн газраа байгуулан ажиллахаасаа илүү Н.Энхбаяр даргыгаа яллуулахгүй байх асуудалд илүү анхаарч байгаа юм байна. Энэ талаар намын удирдлагууд болох МАХН-ын нарийн бичгийн дарга Ч.Улаан, тус намын дэд дарга Д.Тэрбишдагва, МҮАН-ын дарга М.Энхсайхан нар голчлон ярилцжээ. Тэд Н.Энхбаярыг яллуулахгүй байх талаар бүхий л аргыг сүвэгжилж байгаа гэнэ. Хэрвээ тэдний оролдлого бүтэлгүйтэж, Н.Энхбаяр ял сонсвол тус эвсэл Засгийн газарт орж ажиллахгүй гэдгийг “МАХН-МҮАН”-ын “Шударга ёс” эвслийн УИХ дахь бүлгийн дарга Н.Батцэрэг илэрхийлжээ.     Тэгэхээр МАХН-ын дарга Н.Энхбаяр яллагдвал байгуулагдаагүй байсан Засгийн газар тарах аюулд ороод байгаа аж.
    Цаашлаад МАХН-МҮАН-ын “Шударга ёс” эвсэл хоорондоо хоёр хуваагдах байдал үүсэх аж. Учир нь “Мөнхийн дайсан гэж байдаггүй. Мөнхийн эрх ашиг байдаг” гэдэг шиг АН-тай хамтарч Засгийн газар байгуулах ашигтай саналыг МҮАН-ынхан алдахгүй гэж л үзэх байх. Учир нь МҮАН бол АН-аас угшилтай. Тэгэхээр тус намаас УИХ-т сонгогдсон УИХ-ын гишүүд болох Г.Уянга, Д.Батцогт, Л.Цог, Н.Батцэрэг, С.Сономпил, Ц.Цолмон мөн цэцийн шийдвэрээс шалтгаалан УИХ-д орох магадлалтай Ц.Оюунбаатар нар АН-аа дагах гэнэ. Харин МАХН-аас угшилтай Ч.Улаан, Д.Тэрбишдагва, З.Баянсэлэнгэ, О.Баасанхүү нар МАХН-даа үнэнч хандаж үлдэх гэнэ.
    Мэдээж МАХН зүгээр суулгүй сөрөг хүчин болоод буй МАН-тай нэгдэх аж. Гэхдээ ингэж хоёр талд хуваагдсан ч аль аль нь 37, 38 суудал авч, аль ч олонх болж чадахгүй. Тэгэхээр бүр ойлгомжгүй эгзэгтэй зүйл болох юм байна. Юутай ч МАХН-ын дарга Н.Энхбаярын "аавын хаалга" татах уу, "Засгийн газар"-т орох уу гэдгээс ихээхэн зүйл шалтгаалахаар болоод байгаа аж.