Сүхбаатар дүүргийн шүүхэд Н.Энхбаярын авлигын хэргийг шүүх хурал нээлттэй үргэлжилж байна. Дөнгөж сая шүүгдэгчийн өмгөөлөгч С.Нарангэрэл улсын яллагч Ё.Сагсайгаас татгалзаж байгаагаа илэрхийллээ. Тэрбээр "Шүүхээр гэм буруутай нь тогтоогдоогүй байхад шүүгдэгч Н.Энхбаярыг олон удаа хэвлэл мэдээллийн хэрэгслээр гэм буруутай мэтээр ярьсан. Улсын яллагч Ё.Сагсай хувийн сонирхлоор энэ хэрэгт хандаж байгаа тул татгалзаж байна" гэж шүүх бүрэлдэхүүнд хандсан байна. Харин үүний хариуд Ё.Сагсай "Энэ хэрэг аль 2011 оноос хойш явсан. Надад ямар ч хувийн сонирхол, өс хонзон байхгүй. Би зөвхөн улсын яллагчийн зүгээс оролцож байгаа" гэв. Одоогоор шүүх хурал түр завсарлаж, шүүх бүрэлдэхүүн улсын яллагч Ё.Сагсайгаас татгалзах эсэхийг хэлэлцэж байна.
