Гурав дах өдрөө үргэлжилж буй МАХН-ын дарга Н.Энхбаяр нарт холбогдох долоон тэрбумын авилгалын шүүх хурал дөнгөж сая завсарлалаа. Одоо шүүх бүрэлдэхүүн эцсийн шийдвэрээ гаргах юм. Улсын яллагчийн зүгээс Н.Энхбаярыг Эрүүгийн хуулийн тусгай ангийн 263.2-т зааснаар тодорхой албан тушаал хаших эрхийг дөрвөн жилээр хасч,Эрүүгийн хуулийн 150.3-т зааснаар түүний эзэмшлийн дансанд байрлах 8.935.936 ам. доллар, дундын өмчлөлийн Сүхбаатар дүүргийн наймдугаар хороонд оршин орон сууцнаас Н.Энхбаярт оногдох хувийг хурааж, 8.6 жилийн хорих ял, Д.Дуламсүрэнд Эрүүгийн хуулийн 263.2-т зааснаар төрийн албанд ажиллах эрхийг дөрвөн жилээр хасч, 150.3-т зааснаар дундын өмчлөлийн Сүхбаатар дүүргийн наймдугаар хороонд оршин орон сууцнаас Д.Дуламсүрэнд оногдох хувийг хурааж, мөн 10 сая төгрөг хурааж, 6.1 жилийн хорих ял, До.Чулуунбаатарт Эрүүгийн хуулийн 150.3-т зааснаар 10 сая төгрөгийн эд хөрөнгийг хурааж, 5.1 жилийн хорих ял, Ж.Мягмаржаргалд Эрүүгийн хуулийн 150.3-т зааснаар түүний эзэмшлийн Лексус-470 маркийн шал өнгийн машиныг хурааж, 5.6 жилийн хорих ял мөн Эрүүгийн хуулийн 243.2-т зааснаар нэг жилийн хорих ял оноож, нийлүүлээд 6.6 жилийн хорих ялыг биечлэн эдлүүлэхийг шүүх бүрэлдэхүүнд танилцуулсан юм.Хуралд даргалагч шүүгчээр С.Соёмбо-Эрдэнэ, М.Алдар, С.Оюунчимэг, улсын яллагчаар Е.Сагсай, О.Мөнхбаатар, өмгөөлөгчөөр С.Нарангэрэл, Б.Сайнгэрэл, Г.Оюунцэцэг, Ц.Цэрэнжээ, Л.Өлзийхүү, К.Бауржин нар оролцож байгаа билээ.
Б.Чимэг
