Олон улсын эрчим хүчний агентлагийн дарга Фатих Бирол Лондонд болсон бага хуралд оролцсон байна. Тэрбээр “Цөмийн эрчим хүчний салбарын хөгжилд Хятад улс онцгой хувь нэмэр оруулах болсон. Тус улс энэ салбарт АНУ, Францыг гүйцэж, дэлхийд ноёлно” гэж илтгэлдээ онцолжээ. Цөмийн эх үүсгэврээр цахилгаан гаргах цогцолборын гуравны нэг хувь нь Хятад улсад байрладаг аж. Хятадын Засгийн газар 2030 онд гэхэд эрчим хүчний экспортоор АНУ-ыг гүйцэж түрүүлж, цөмийн эрчим хүчний орон болох зорилт тавьжээ. Олон улсын эрчим хүчний агентлагийн сайтад нийтэлсэн тоо баримтаас үзвэл, 2016 оны байдлаар цөмийн эх үүсгэврээр гарган авсан цахилгааны хэмжээ Хятадын эрчим хүчний хангамжийн хоёр хувийг эзэлж байв. Энэ үзүүлэлтийг 2040 он гэхэд дөрвөн хувьд хүргэх зорилт дэвшүүлсэн байна. Өнөөдрийн байдлаар дэлхий дээр 31 оронд цөмийн цахилгаан станц ажиллуулж байна. АНУ өнгөрсөн зууны 60-аад оноос хойш өнөөдрийг хүртэл цөмийн эрчим хүчний салбарт ноёлж ирсэн билээ. Гэвч цөмийн үүсгэвэрт цахилгааны цогцолборын хүчин чадал хязгаарлагдмал, цөмийн цахилгаан станцдаа засвар оруулах төлөвлөгөөгүйн улмаас АНУ тэргүүлэх байр сууриа алдаж эхэлснийг Фатих Бирол дурьдсан байна. Харин цөмийн 58 реакторын парктай Франц улс аж үйлдвэрийн группууд болон жижиг дунд үйлдвэрүүдийнхээ 60 жилийн тогтмол хөрөнгө оруулалтын үр дүнд дэлхийн цөмийн эрчим хүчний салбарт АНУ-ын дараа бичигддэг ажээ. Энэ салбарт дэлхийд гуравт бичигддэг БНХАУ цөмийн 28 реактор шинээр барьж байгаа бөгөөд Өмнөд Солонгос, Энэтхэг, ОХУ 21 реактор байгуулах төсөл хэрэгжүүлж байна.