Өчигдөр болсон УИХ-ын нэгдсэн чуулганы үеэр УИХ-ын гишүүн Д.Тэрбишдагваас дараах зүйлийг тодрууллаа. -МАН-ынхан чуулганд оролцож эхэллээ. Гэхдээ тэд АН болон “Шударга ёс” эвсэлд нэлээн шүүмжлэлтэй хандаж байна?
-МАН-ынхан өнөөдөр /өчигдөр/ УИХ-д орж ирж байгаа нь сайн зүйл. Хүндэтгэлтэй хандаж байна. Гэтэл өнөөдрийн /өчигдөр/ хуралдаанаар Ерөнхий сайдыг сонгох асуудлыг хэлэлцэж байхад олон жил хууль тогтоох байгууллагыг дампууруулж, шоронжуулсан Ц.Нямдорж гэдэг хүн асуудлаа мэдэхгүй буруу тийшээ хазааж, заалны уур амьсгалыг эвдсэн. Ерөнхий сайд Н.Алтанхуяг гэдэг хүний асуудлыг хэлэлцэж байхад тэр хүн “Шударга ёс” эвслийнхэн рүү дайрч байгаа нь тун хариуцлагагүй үйлдэл. МУ-ыг архидалт, шоронжсон улс болгоход энэ хүний хийсэн зүйл тодорхой харагдаад байна. Мөн хурлыг ажил хэрэгч биш хэрүүлийн болгосон нь ч тодорхой харагдлаа.
-Та Ц.Нямдорж гишүүнийг улс төрийн зөнөглөл болж байна гэлээ. Энэ талаар?
-Настай хүмүүс зөнөөд ирэхээрээ ярьсан хэлснээ мартаад, нэг ярьснаа дахин дахин яриад байдаг. Ц.Нямдорж гишүүн насны хувьд Д.Дэмбэрэл гишүүнийг бодвол залуу хүн. Зарим нэг хүний хажууд ч залуу. Гэтэл тэрээр сүүлийн сар гаруйн хугацаанд телевизийн нэвтрүүлэгч шиг хэвлэлээр улаантнууд, цагаантнууд, урвагч гээд нэг ярьснаа дахин дахин яриад байна. Ц.Нямдорж гишүүн Хууль зүйн сайдын суудлаа өгнө гэхээр л ухаан алдчих гээд байх юм. Түүнээсээ болж буруу зүйлийг дахин дахин ярьж байгаа нь насны хувьд биш улс төрийн хувьд улс төрийн юм ярих чадваргүй болоод зөнөчихөж. Ц.Нямдорж ХЗДХЯ-ны сайдыг олон жил хийлээ. Энэ хугацаанд тус яам өөрчлөгдсөнгүй. Албан тушаалаасаа буух гэхээр “Боож үхэж, босож харайх” гээд байгаа байдлыг нь харахаар өөрөө өөрийгөө өөрчилсөн чадвартай байгаасай гэсэндээ зөнөглөл гэдэг үгийг гаргаад ирлээ
.
-Түүнийг ХЗДХЯ-ны сайдын суудлаа өгөх дургүй гэх гээд байна уу?
-Хүн албан тушаалдаа ямар их дуртайг байдгийг Ц.Нямдорж гишүүнээс харж болно. ХЗДХЯ-ны суудлаас огцруулах асуудал яригдаж байхад нэг ч үг дугарахгүй, үгээ залгисаар байгаад суудалдаа үлдсэн. Гэтэл одоо суудлаа авч чадахгүйгээ мэдсэн болохоор олон юм ярьж байна л даа.
-МАХН-ын дарга Н.Энхбаярыг ялласнаар танай эвсэл Засгийн газарт хамтрахгүй гэж байсан ч хамтарлаа. Энэ нь даргыгаа хаялаа гэх шүүмжлэлийг дагуулаад байх шиг?
-Бид даргыгаа орхиогүй. Өдөр бүр уулзаж байгаа. Бид шүүх засаглал, прокурор, АТГ-тай асуудлыг ярих болохоос биш хамтарч улс төрийн үйл ажиллагаанд оролцож байгаагаа даргыгаа орхисон гэж ойлгохгүй байгаа. Бид цаашдаа шударга үнэний, хэлмэгдүүлэлтийн төлөө тууштай тэмцэх болно.
Б.Чимэг
