Италийн өмнөд хэсэгт агаарын хэм огцом нэмэгдэн, өндөр хэмтэй халуун болж байна. Ойрын өдрүүдэд  дундаж хэм +44-д хүрээд байгаа бөгөөд үүнээс болж хөдөө аж ахуйн салбарт хүндрэл гарч эхлээд байна. Хэт халуун уур амьсгал нутгийн хойд хэсгийн Болонья хотоос, өмнөд хэсгийн Реггио Калабриа хот хүртэлхийг хамарч байгаа гэнэ.
“Анса” агентлагийн мэдээлж буйгаар тус улсад хэт халууны улмаас түгшүүр зарласан байна. Агаарын хэм ийнхүү өндөр байгаа нь Сицилийн арлуудад гараад буй түймрийг нэмэгдүүлэх  таатай нөхцлийг бүрдүүлээд байгаа юм. Өчигдрийн байдлаар ердөө 20 гаруй гал унтраах онгоц 32 түймрийн голомт руу явсан гэнэ. Одоогийн байдлаар 17 түймрийг багасгаж, зармийг нь унтраасан байна. Сар гаруйн хугацаанд үргэлжилсэн хуурайшилтаас болж тус улсын хөдөө аж ахуй, ялангуяа газар тариалангийн салбар уналтад ороод байгаа юм.