Хилийн чанадад монголчуудад тохиолдсон энэ долоо хоногийн цочир сонин үйл явдал зөвхөн олимпийн наадмаар хязгаарлагдсангүй. Лондонд хөлсөө дуслуулан, алдар нэрээ дуурсгаж яваа дүү нараасаа дутахгүй гэсэн Монголын хэсэг ахмадууд хилийн ойролцоох Галуут нуураас (ОХУ, Буриадын нутаг) Хамар даваа даван явганаар Байгаль нуур луу аялаж яваад төөрчээ. Энэ бол хүний хөл, төв зам үгүй тайга юм. Газрын зурагаар баримжаалан бүтэн долоо хоног аяласны эцэст монголчуудын хүнс дуусчээ. Хамгийн харамсалтай нь газрын зурагаа гээсэн байна. Орчуулагчаараа болсон явдлыг орос хэл дээр буулгуулж, тусламж гуйсан захидлаа аяллын багийн хамгийн залуу нь аваад хүний эрэлд гарчээ. Үлдсэн нөхдийнхөө амь амьдрал, хувь заяаг дайсан энэ хүн эцэст нь Кабанск районы цагдаа нарт хүрч чадсан байна.

   Мягмар гарагийн орой Буриадын Дотоод хэргийн яамны шуурхай жижүүрт Кабанск районы балар ойд төөрсөн 16 гадаадын жуулчин суурин газарт хүргэж өгөхийг хүссэн дуудлага хүрэв. Гадаадын зоригт жуулчид нь голдуу тэтгэврийн өмнөх насны монголчууд. 16 аялагчийн 2 нь л эрэгтэй бусад нь эмэгтэйчүүд байсан гэж Буриадын Онцгой байдлын яам мэдээлжээ. Дуудлага авсан даруйдаа аврагчид, цагдаа нар КАМАЗ машинаар эрэлд гарч маргааш нь буюу 8 дугаар сарын 9-ний лхагва гарагийн үд дунд Мантуриха гол дагуух зөрөг зам дээрээс тэднийг олсон байна.

-Гол үертэй, машин явах боломжгүй байсан. Тэргээ орхиод 2-3 км явган явж байж тэдний түр буудалласан газрыг олж очсон гэж Буриадын ДЯЯ-ны шуурхай жижүүрийн албаны дарга Николай Назаров ярьж байна.
     Монголын аялагчдын баг замд гарахдаа ном журмын дагуу орон нутгийн авран хамгаалах албанд аяны чиглэл, хуваариа танилцуулалгүй бие даан хөдөлжээ. 2010 онд Монголын жуулчид газарчны хамт энэ замыг туулж Байгаль нуурт хүрсэн бөгөөд энэ удаа өөрсдийнхөө хүчинд найдсанаас ийм эгзэгтэй байдалд хүрчээ.

-Орчуулагчтай, газрын зураг дээр баримжаа авч байсан болохоор тэднийг азтай хүмүүс гэж болно. Амь насаа алдах явдал ч гарч  болох байсан гэж аврагч нар мөн хэлжээ. Буриадын аврагчдыг сандаргасан Монголын аялагчид өөрсдөө ч багагүй сандарсан байсан гэнэ. Мэдээж, ар гэрийнхэн, үр хүүхдүүд нь Лондон явсан тамирчдаас илүү догдолсон биз ээ.
Одоогоор явган аялагчдыг Бабушкин хотод хүргээд байна. Биеийн байдал нь дунд зэрэг гэж Оросын хэвлэлүүд мэдээлжээ.

   Монголчууд Буриадад ийнхүү “идэвхтэй амарч” явахтай зэрэг Буриадын ахмадууд Улаанбаатарын “Оргил” рашаан сувилалд нөхөн сэргээх эмчилгээ хийлгэхээр ирж байна. Хоёр улсын холбогдох яамдын тохиролцсоны дагуу 2008 оноос жил бүр Монгол улс болон ОХУ-ын Буриад улс өндөр настнуудаа харилцан солилцож амраах болжээ.

-Монголын ахмадууд жилд хоёр удаа манай ахмад дайчдын эмнэлэгт сувилуулдаг. Одоо энэ найм, есдүгээр сард манай 15 өндөр настан Монголд очиж сувилуулна. Эмчилгээний ихэнх хэсгийг улс даадаг гэж Буриадын нийгмийн халамжийн яамны мэргэжилтэн ярьж байна.

   Өнгөрсөн хугацаанд Монгол, Оросын нийт 200 орчим өндөр настан хөршийндөө зочлон шавар түрхүүлж, зүү тавиулж, рашаанд сууж, нөхөн сэргээх эмчилгээ хийлгэжээ.

Буриад, Монголын ахмадуудтай холбоотой сонин мэдээтэй ийм нэгэн долоо хоног байлаа.