МҮОНРТ-ийн "Хит" хөгжмийн нэвтрүүлгээр олонд танигдсан хөтлөгч, редактор П.Давааням өчигдөр өвчний улмаас таалал төгсчээ. Энэ мэдээг сонссон гэр бүл, найз нөхөд, уран бүтээлчид болон түүнийг хүндэлж явдаг хүн бүр гүн эмгэнэн гашуудаж байна.

   МҮОНРТ-ийн сэтгүүлч Б.Сарантуяа өөрийн фэйсбүүк хуудасдаа: "Бидний хайртай анд, Монголын нэгэн авъяаслаг сэтгүүлч Д. Даваанямыг Мөнх тэнгэр биднээс яаравчлан авч одлоо. Ирээд буцах нь үнэн энэ хорвоод ижилдэн явсан анд минь биднээсээ дэндүү эрт буцчихлаа. "Амьддаа бие биенээ хайрла" гэдэг үгийг мэдсээр байж амьдад нь баярлуулж чадсангүй дээ найзыгаа. Даавка минь чи Мөнх хөх тэнгэр, Мөнхөд ногоон газар дэлхийдээ амгалан нойрс доо...Чиний бахархам авъяас, онцгой мэдрэмж, ил цагаан сэтгэл чинь бидний төдийгүй Монгол түмний сэтгэлд хоногшин үлдэх болно...Ум сайн амгалан болтугай" гэжээ.

Мөн "Өглөө" хөтөлбөрийн хөтлөгч, редактор Д.Туул:  "Давкаг минь амьдралын нугачаанд бүдчиж явахад нь олон ч найз нөхөд нь, хамтран зүтгэгчид нь дөлж жийрхэж явсан. Гэвч хийж бүтээсэн үйл нь, монголын төдийгүй дэлхийн хөгжмийн урлагийн амьд нэвтэрхий толь болж явсан авьяас хөдөлмөр нь ийм олон хүний сэтгэлд мөнхрөн үлдсэнийг уншиж суухад сайхан байна. Анд минь амгалан нойрс доо. Хайрлаж хүндэлж явсан үзэгч олон тань чиний төлөө залбирч байна. Ум сайн амгалан болтугай" хэмээн эмгэнэлээ илэрхийлжээ.