Оросын хоёр удаагийн аварга (2009, 2010), Европын аврага (2010), Дэлхийн цомын аврага (2008), ДАШТ-ий хүрэл медальт (2009), Дэлхийн аврага (2011) Миша Алоян Лондоны олимпийн боксын 52 кг-ийн жингийн хагас шигшээд Монголын Н.Төгсцогтод ялагдсан билээ. 15:11 харьцаатай энэ ялагдлынхаа учрыг Оросын боксын холбоо олох гэж толгойгоо гашилгаж байна.

   - Миша Алоян хагас шигшээд Монголын Н.Төгсцогттой тоглохыг нь харахад танихгүй хүн шиг болчихсон байсан гэж Оросын боксын холбооны дэд ерөнхийлөгч Вячеслав Клименко хэлжээ.

  - Хэтэрхий улайраад шатсан уу, эсвэл тулаанд бэлтгэлгүй байсан юм уу, бүү мэд. Алояныг рингэн дээр харсангүй. Тэр эзгүй юм шиг л байсан. Бид өмнөхөөсөө шал өөр Алояныг харлаа. Мишаг монгол овоо нүдсэн, харамсалтай. Уул нь тэр монгол манай хүний түвшний боксчин биш л юм сан. Эсрэгээрээ Мишад тийм өрсөлдөгчтэй ажиллах уул нь амархан байдаг. Гэсэн чинь хурд ч үгүй, оновчтой цохилт ч байхгүй, ерөөсөө юм юмгүй, хөвөнгөөр хийчихсэн юм шиг л байлаа. Хачин юм. Бид түүнийг алтын төлөө баталгаатай гараад ирнэ гэсэн бодолтой байсан гэж боксын холбооны дэд ерөнхийлөгч нь гайхаширч байна.

Харин Оросын боксын холбооны захирал, олон улсын хэмжээний шүүгч Евгений Судаков:
  - Алоянд юу тохиолдсоныг би тайлбарлаж чадахгүй нь. Рингэнд гараад өөрийнхөөрөө үзэлцэж ерөөсөө чадсангүй. Тийм туршлагатай боксчинг шатсан гэж тайлбарлахад хэцүү юм. Үүнээс ч илүү өрсөлдөгч нартай тулахдаа шатдаггүй хүн. Юу болсныг хэн чтайлбарлаж чадахгүй байна гэжээ. Судаков цааш нь ярихдаа:

  - Алоян 2009 онд Төгсцогтод дэлхийн аваргаар ялагдаж байсан. Энэ үндсэн дээр түүнд ямар нэг болсон байж магадгүй. Эсвэл өөр юм ч юм бил үү. Өрсөлдөгч рүүгээ зүгээр үсэрч очоод ганц цохилтоор тулаанаа дуусгачих гэж зүтгээд байсан. Хэн ч ингэдэггүй шүү дээ гэж толгой сэгсэрчээ.
Түүний ярьснаар бол Монголын баг хүрэл медальдаа ханачихаад байжээ.


   - Урд өдөр нь бид Монголын дасгалжуулагч нартай уулзаж ярилцсан. Алоян хамаагүй илүү гэдгийг тэд ойлгож байсан болохоор хүрэл медалийн болзол хангасандаа баярлаж байсан. Тэгсэн чинь маргааш нь монгол илүү хөдөлгөөн хийхгүй, шулуун цохиод, төгс сайн ажилласан. Харин манай Миша юу ч хийгээгүй. Яахаа мэдэхээ байгаад хаа тааралдсан газраа цохих гэж оролдсон. Тэр тулаанаа ойлгохгүй, шал ондоо газар байх шиг байсан даа хэмээн ярьж байна.
    2000 оны олимпийн наадмын аварга Александр Лебзякийн тайлбарлаж байгаагаар бол Алоян өөрөөс хамаарах бүхнээ хийсэн боловч мэдрэлийн хэт ачаалал нөлөөлсөн байж магадгүй гэнэ.

-Яахав, ганц нэг удаа довтолгооны хувилбар гарчих гээд байсан. Гэхдээ бүхэлдээ бол... Түүнийг монгол  зүгээр нэг тооцоолоогүй, бүр урьдчилаад бэлтгэчихсэн байж. Алояны нөгөө комбинацууд байхгүй. Хийх гэсэн юм нь болохгүй байсан ч өөрчлөөд зүтгээд үздэг дээ. Даанч... Ур чадвар, тактикийн нөөц байхгүй нь харагдсан. Монгол үл ялиг илүү байсан гэдгийг раунд болгоны оноо харуулсан шүү дээ гэж уг тулааныг дүгнэжээ.

  “Хэргийн эзэн”, шүүмжлэлийн бай болж, Орсын боксын найдварыг хугалсан “ялд” унаад байгаа Миша Алоян хэмээх армен залуу интернэт дэх өөрийн блогтоо “Намайг дэмжсэн бүх хүмүүст баярлалаа. Бурхан дараагийн удаад  алтан медаль хайрлаг” гэж бичсэн байна. Олимпийн наадмын өмнө өгсөн ярилцлагынхаа үеэр тэр “Ямар ялалт, аль тэмцээний алтан медаль илүү чухал вэ?” гэсэн сэтгүүлчийн асуултад:
   -Мэдээж олимпийн. Удахгүй олимпийн алтан медалиа аваад Новосибирсктээ ирнэ гэж болдож байна. Өөр медальтай би эвлэрэхгүй. Мөнгөд дургүй, хүрэлд ч бас. Ялан дийлэх хүсэл, алт авах мөрөөдөл ямар ч тамирчны аль ч уралдаан дээрх зарчим байх ёстой гэж би боддог гэж хариулж байв.
       Гэвч Миша Алояны энэ хүслийг 20 настай монгол залуу Нямбаярын Төгсцогт таслан “дургүй” хүрэл медаль дээр нь буулгаж орхижээ. 2009 онд Италид бас л Н.Төгсцогт 17 настайдаа түүнийг хүрэл дээр “суулгачихсан” юм.