Стэнфордын их сургуулийн профессоруудын ардчиллын тухай лекц Төрийн ордонд үргэлжилж байна. Профессор Стивен Краснер “Төр улсыг засан тохинуулахуй: Юу зохистой байна?” сэдэвтэй лекц уншиж үүндээ “голланд өвчин” буюу баялагийн хараалын тухай жишээ баримттайгаар онцлон хэлсэн юм. Тэрбээр Монгол улс уул уурхай хөгжиж байгаа жижиг орон гэдэг утгаараа энэ “өвчин”-г тусах магадлалтай. Тиймээс үүнийг хянаж, зохицуулах хүчирхэг институц хэрэгтэй гэлээ. Үүнийхээ дараа тэрбээр Монголын хөгжлийн сан байгуулах санал гаргаж байгаагаа хэлсэн юм. Профессор Стивен Краснерийн санал болгосноор Монголын хөгжлийн санг нэг талаас Монгол улсын Засгийн газар, нөгөө талаас Азийн хөгжлийн сан гэх мэт аль нэг олон улсын байгууллага хамтран үүсгэх боломжтой аж. Мөн тус санг Сингапур гэх мэт гуравдагч оронд байгуулах бөгөөд данс нь ч гуравдагч орны сүлжээнд байрлавал илүү хяналт сайтай болно гэв. Тэрбээр "Монголын хөгжлийн санд улсын төсөвт уул уурхайн салбараас орж ирсэн орлогын 70 хувийг төвлөрүүлэх бөгөөд энэ хөрөнгийг дэд бүтэц, нийгмийн хөгжилд ашиглах хэрэгтэй. Мөн захирлуудыг Монголын Засгийн газар болон олон улсын байгууллагаас ижил хэмжээтэй гаргавал зохистой. Харин мөнгө, хөрөнгийг юунд зарцуулах вэ гэдгээ Монголын тал бие даан шийдэх боломжтой ийм сан юм" гэв. Профессор Стивен Краснер нь Корнеллийн, Колумбын, Харвардын их сургуулиудыг тус тус дүүргэжээ. Краснер нийт зургаан ном бичиж, 90 гаруй өгүүллэг нийтлүүлсэн байна.
