Энэ сарын 16-18-ны өдрүүдэд жанжин Д.Сүхбаатарын талбайд 37 дахь удаагийн “Номын баяр” болох гэж байна. Монгол Улсын Ерөнхийлөгчийн 158 дугаар зарлиг, Нийтээр тэмдэглэх баярын болон тэмдэглэлт өдрүүдийн тухай хуулийн дагуу Үндэсний бичиг соёл, номын өдрүүдийг 5 болон 9 дүгээр сарын гурав  дахь долоо хоногийн бямба, ням гарагт тэмдэглэдэг юм. 

Уг баярын тухай таны мэдвэл зохих бүх зүйлийг хураангуйлав. 

• Номын баяр нь ард иргэд, хүүхэд, залууст ном унших соёл, дадал хэвшүүлэх, номтой нөхөрлөх эерэг хандлага бий болгох, зохиолч, туурвигч, идэвхтэн бичигчид, ном, хэвлэлийн салбар, нийтийн уншлагыг дэмжин сурталчлах зорилготой. Баярын үеэр номын үзэсгэлэн, монголын болон дэлхийн шилдэг ном, бүтээлийн худалдаа, шинэ номын нээлт, зохиолч-уншигчдын уулзалт, дотоод, гадаадын хэвлэлийн газруудын болон номын маркетинг-борлуулалтын уулзалт,  “Байгаль экологийн 50 ном”-ын танилцуулга, хүүхдэд зориулсан номын хөтөлбөр зэрэг үйл ажиллагаа болно. 

Хугацаа: 2025 оны 05 сарын 16-18ны хоорон 10:00-20:00 цаг хүртэл

Зохион байгуулагч: “Номын Соёлт Ёртөнц” ТББ 

Хэвлэлийн түнш: "МОНЦАМЭ" агентлаг, "Аргун" хэвлэлийн газар, "Мөнгөн бороо" ХХК 

Уриа үг: "Илүү их уншъя - Мазаалайтай номын баяр" 

Асрын хэмжээ:

• Том 5х5 метр

• Жижиг 3х3 метр

• Өндөр 2,5 метр

Асрын хана туургыг цоолж гэмтээх, цавуугаар түлэх, скоч наасаны улмаас халтартаж, гэмтсэн бол үзэсгэлэнд оролцогч цэвэрлэгээ, засварын зардлыг төлөх ёстой ажээ. 

Үндэсний бахархалт амьтан Мазаалайн асруудыг бэлдэж, зохиолчидтой биечлэн уулзах, кофе, цай ууж номын тухай яриа дэлгэн суух тусгай орчин бий болгожээ.

Номын салбарын гадаад хамтын ажиллагааны хүрээнд монгол зохиолчдын ном бүтээлийг БНСУ-ын Бусад хот болон Сингапурын Олон улсын хүүхдийн номын үзэсгэлэн, Турк, Ираны хэвлэн нийтлэгчдийн нөхөрлөлийн хөтөлбөр, Малайз, Казахстан Улсын Астана хотноо болсон номын үзэсгэлэнд оролцсон амжилтаар баяраа угтаж байна.

Энэ удаагийн баярт ОХУ, БНХАУ, БНСУ-аас зохиолч, хэвлэн нийтлэгчид оролцоно. Түүнчлэн “Либро сувд агентлаг”-аас монгол зохиол бүтээлийг гадаад орны уншигчдад эх хэлээр нь хүргэх, монголын оюуны бүтээлийг экспортлох ажлыг эхлүүлж байна. Мөн орчуулган номын эрх авах, номын редактор, ном зүйн үйлчилгээ, номын маркетинг хэсгээс хэвлэлийн үнэ бодуулах, шинэ хэвлэх номынхоо цаас, материалыг сонгох зэргээр ном бичих хүсэлтэй уншигчдад зориулсан шинэ үйлчилгээг хүргэх аж.

Номын баярт нийт 300 мянган оролцогч, 200 хэвлэн нийтлэгч, 300 гаруй зохиолч, 10 улсын төлөөлөл оролцдог төдийгүй нийт зорин ирж буй хүмүүсийн 80 орчим хувь нь 30-аас доош насны залуучууд байна. 

Үндэсний номын баярыг 2007 оноос “Номын ертөнц” нэвтрүүлгийн хөтлөгч, редактор Б.Сувдын санаачилгаар зохион байгуулж эхэлсэн. Одоо “Номын соёлт ертөнц” ТББ-аас жил бүрийн 5,9 дүгээр сарын гурав дахь долоо хоногийн амралтын өдрүүдэд тогтмол зохион байгуулж буй юм.

1. Цагийн хуваарь

• Эхний өдөр 10:00-20:00

• Хоёр дахь өдөр 10:00-20:00

• Гурав дахь өдөр 10:00-19:00 цаг хүртэл байна.

Оролцогч тал олгосон талбайгаас хэтэрч болохгүй. Баярын онцлогтой нийцэхгүй, элдэв худалдаа зэргийг түдгэлзүүлэх, оролцогчийн жагсаалтаас хасах, талбайгаас гаргах эрхтэй. Энэ тохиолдолд оролцогчийн хураамжийг буцаан олгохгүй бөгөөд нөхөн төлбөр шаардах эрхгүй.

2. Номын баярын зохион байгуулалт

- Баярын оролцогч асар доторх ном болон эд зүйлээ хулгайд алдах, эрсдэлт нөхцөл үүсэхээс урьдчилан сэргийлэх үүрэгтэй.

- Оролцогчид, эд зүйлтэй холбоотой гэмтэл, хулгай, гал түймэр, бусад хохирлыг зохион байгуулагч хариуцахгүй бөгөөд оролцогч тал ослоос урьдчилан сэргийлэх бүх арга хэмжээг авах ёстой.

- Номын баярын үеэр зочдод чиглэсэн сурталчилгааны үйл ажиллагааны хэвлэмэл материал зэргийг тарааж болно.

- Оролцогч номын баярын үеэр туслах түр ажилтан, үндсэн ажилтнаа хувцсаар жигдрүүлэхэд анхаарна. Мөн харилцаа хандлага, хэл яриагаараа зохион байгуулагч талын номын клубийн сурагчидтай зөв боловсон харилцана.

3. Оролцогчийн сурталчилгааны үйл ажиллагаа

- Оролцогч зөвхөн өөрийн асартаа үзэсгэлэнгээ дэлгэх, сурталчилгааны материалаа тараана.

- Нийтийн хэв журам сахиагүй, ёс суртахуунгүй, зүй зохисгүй, баярын үйл ажиллагаанд нийцээгүй хэвлэмэл материал тараахыг хатуу хориглоно.

- Оролцогч тараасан сурталчилгааны материал нь талбайн цэвэр байдалд сөргөөр нөлөөлж байвал тараахыг хориглоно.

- Номын баярын зорилго, дүрэм журамтай зөрчилдсөн бусад сурталчилгааны үйл ажиллагаа явуулахыг хориглоно.

- Оролцогч номын баярын үеэр бусад байгууллагын танилцуулга, хөдөлмөр эрхлэлтийн зартай холбоотой аливаа материалыг дэлгэхийг хориглоно.

- Оролцогч номын баярын үеэр уур амьсгалыг алдагдуулахгүй, бусдад саад учруулахгүйгээр зөвхөн асартаа арга хэмжээ зохион байгуулж болно.

- Оролцогч асар дотроо зохион байгуулж буй арга хэмжээний агуулгаа зохион байгуулагчид ирүүлэх ба төлөвлөгөөнөөс өөр байвал зохион байгуулагч арга хэмжээг түдгэлзүүлэх эхсүл хариуцлага ноогдуулж болно. Оролцогч нь учирсан хохирлоо нэхэмжлэх эрхгүй.

Л.Баяр