Богд уулын Дархан цаазат газрын хамгаалалтын албаныхан өнгөрөгч амралтын өдрөөр отолт хийн Зайсангийн амнаас таван шуудай түүхий боргоцой хураасан байна. Самарчид Богд дүнжингаравын орой хавьд орших “Дугуй цагаан” гэдэг газраас самар түүснээ ярьжээ. Тэд үүрээр гараад үдшээр ийнхүү Зайсангийн амаар орж ирээд автобусны сүүлчийн эргэлтээр хотод орж ирдэг юм байна.

Самрыг нь хурааснаас өөр арга хэмжээ авч чадаагүй аж. Торгох гэхээр огт мөнгөгүй хүмүүс байжээ. Энэ мэт явдал олон тохиодог бөгөөд дорвитой арга хэмжээ авахгүй бол таслан зогсоож чадахааргүй болсныг хамгаалалтынхан тайлбарлаж байна. Зөвхөн тэд ч биш, олон хүн Богд ууланд самар түүж яваа аж.  Самарчид хагас, бүтэн сайн гэлтгүй өдөр бүр явдаг бололтой. Санзайгаас ч самарчид хот орж ирдэг болжээ.