Ерөнхийлөгч Ц.Элбэгдоржийн урилгаар “ардчиллын онолчид” гэж нэрлэгддэг Стэнфордын их сургуулийн профессор Фрэнсис Фукуяама, Ларри Даймонд, Стивен Краснер нарын лекц, уулзалт болж өндөрлөлөө. Гурван профессор “Дэлхийн санхүүгийн хямралын дараах хөгжлийн загварууд”, “Ардчиллын чанар чансаа, түүний оршихуйн увидас”, “Төр улсыг засан тохинуулахуй: Юу зохистой байна?” гэсэн сэдвээр лекц уншлаа. Лекц, уулзалтанд оролцож байгаа монголчууд Монголд ардчиллын ямар хэлбэр, тогтолцоо тохирох талаар ихэвчлэн асууж байлаа. Профессор Фрэнсис Фукуяама “Ардчиллын энэ онолууд бүгд Монголд хэрэгжинэ гэж хэлэхэд хэцүү. Ардчиллын нийтлэг томъёо гэж байхгүй. Тухайлбал АНУ-ын Үндсэн хуулийн тогтолцоог Монголд шууд нэвтрүүлнэ гэдэг нь хэтэрхий идеалист байдлаар хандаж байгаа хэрэг. Улс төрчид өөрийн хувийн эрх ашгийн төлөө биш, улсынхаа төлөө тэсвэр хатуужилтай хэрэгтэй” гэв.

   Ерөнхийлөгч Ц.Элбэгдорж “Унахгүй гэж байгаагаа мэдэх юм бол бид аюулаас зугтааж чаддаг. Төр нь судалгаагаа удирддаг биш төрөө судалгаа нь хөтлөх ёстой юм. Эрх чөлөөтэй хүн шинээр баялаг бүтээх боломж байдаг гэдгийг профессор Фрэнсис Фукуяама хэллээ.  Ардчилсан төр ч, ямар ч хүн мөнгөнд дуртай. Тиймээс гараа хүлээд хэрэгтэй зүйлдээ мөнгөө зарцуулах хэрэгтэй гэж Стивен Краснер хэлснийг дэмжиж байна. Бид хэчнээн ардчилал яриад хууль нь хэрэгждэггүй бол ямар ч хэрэггүй болно” гээд лекцийг өндөрлүүллээ.
   Эрдэмтэд Монголд 4-5 хоног байх бөгөөд энэ хугацаанд Ерөнхийлөгчийн Тамгын Газраар дамжуулан мэдэхийг хүссэн асуултаа илгээж болох аж. Мөн өнөөдрийн лекцийн видео бичлэгийг president.mn сайт дээр байрлуулах юм байна.

Б.Баяр