Дахин сонгогдож чадаагүй УИХ-ын гишүүд хаана, юу хийж явна вэ гэдэг олон нийтийн анхаарлыг багагүй татаж байна.  Энэ жил АН олонхи болж 2008-2012 оны парламентад сууж байсан 76 гишүүний яг тал нь явж, 36 шинэ гишүүн ирсэн. Харин тэр дундаас АН-ын хуучин гишүүдийн олонхи нь шинэ Засгийн газарт багтахаар болов. Яамдын сайд нараас гадна ерөнхий сайдын зөвлөхөөр Л.Гансүх, П.Алтангэрэл, Батж.Батбаяр, Кёкүшюзан Д.Батбаяр, Д.Зоригт, С.Ламбаа, Ц.Сэдваанчиг, Д.Одхүү нарын гишүүн болж чадаагүй нөхдүүд томилогдохоор болж байна. Тэгвэл энэ дунд нам нь сонгуульд ялж, олонхи болсон ч хоосон үлдсэн ганц, хоёр гишүүн байгаа юм. УИХ-ын гишүүн Л.Гүндалай гэхэд л 12 жил сонгогдсон Хөвсгөлийн тойрогт ялалт байгуулж чадаагүйн дээр шинэ Засгийн газарт орж чадахгүй болсон тул гомдолтой байгаа аж. Тэрбээр АН-ыг цөөнх байхад ганц дайчин ганцаардахгүй гэдэг шиг парламентад энэ намын дуу хоолой нь болж явсан. Зарим нь АН-ыг энэ хүнээр төсөөлж байсан цаг ч бий. Өөрийнх нь хэлснээр “АН-ыг гудамжинд гарахад ганцаараа дотор нь тэмцэж байж олны танил болсон” нэгэн. Гэтэл үүнийхээ хариуд тэрбээр шинэ Засгийн газарт ядаж нэг дарга, даамлын суудалтай болж чадахгүйд хүрчээ.

   Уг нь Л.Гүндалай өмнө нь нэг удаа заларч байсан Эрүүл мэндийн яамандаа очих хүсэлтэй байгаа аж. Тэрбээр “Манай /АН-ын/ фракциуд эрүүл мэндийн салбарыг сонирхохгүй байгаа нь учиртай. Салбарыг удирдаж байгаа хүн нь эмч байх ёстой болчихно. Гэтэл манай фракциудад бүү хэл намд цөөн хэдэн эмч бий л дээ. Тэрний нэг нь би юм” гэх зэргээр яриа өгчээ. Уг нь түүнд хуучин яамдаа эргэн очин сонирхол байгаа ч энэ яам аль хэдийн “Шударга ёс” эвсэлд оногдчихсон байгаа.
  Тэрбээр “Миний хувьд АН-ыг цөөнх байхад гишүүнээр сонгогдож байсан. Харин олонхи болоход нь ялагдчихлаа. Нэг бодлын их харамсалтай байна даа” гэжээ. Түүнд бялуунаас хишиг, хувь олдохгүй байгаагийн шалтгааныг тэрбээр өөрийн “ганц дайчин” чанартайгаа холбож тайлбарлажээ. Л.Гүндалай АН дотроо аль нэг фракцитай сүжирч наалдаад байдаггүй тул ийнхүү бялууны хэрчмээс олж авч чадаагүй аж. Энэ нь хэн их холбоо сүлбээ, найраа /энэ дунд мөнгө ч орно/ сайтай байна тэр эрх мэдэлтэй болдог гэдгийг харуулаад байх шиг. Л.Гүндалайн хувьд олон жил парламентад суусан, тэрнийхээ хэрээх гайгүй сайн бизнестэй. Тиймээс энэ дөрвөн жилийг бизнесээ өргөжүүлэх зуураа УИХ, Засгийн газрыг гаднаас нь харж суух боллоо. Харин дараагийн сонгуульд өрсөлдөх бодол түүний яриан дундаас цухалзаж байдаг шүү.