Хөдөлмөр, нийгмийн хамгааллын яаманд үндэсний нийгмийн зөвшлийн гурван талт хороодын хуралдаан болж байна. Хуралдаанаар Хөдөлмөрийн тухайн хуулийн шинэчилсэн найруулга, төрийн албан хаагчдын цалин хөлсний нэмэгдэл болон бусад асуудлаар хэлэлцэгдэх юм.

Энэ үеэр Монголын үйлдвэрчний эвлэлийн холбооны ерөнхийлөгч Х.Амгаланбаатартай ярицлаа.

-Өнөөдрийн нийгмийн зөвшлийн гурван талт хороодын хуралдаанаар ямар асуудал хэлэлцэгдэх вэ?

-Өнгөрсөн оны есдүгээр сард хөдөлмөр, нийгэм зөвшлийн улсын гурван талт цалин хөлс нэмэгдүүлэх хэлэлцээр хийсэн. Энэ хүрээнд цалин хөлсийг 20-оос доошгүй хувиар 2019 оны нэгдүгээр сарын 1-ээс эхлэн үе шаттайгаар нэмэгдүүлэх болсон юм. Хамгийн гол нь төрийн албан хаагчдын цалин хөлс, тэтгэвэр тэтгэмжийг энэ сараас үе шаттайгаар нэмэгдүүлэх асуудалд хэлэлцээр хийж тодорхой болгох ёстой. Уг нь Монголын үйлдвэрчний эвлэлийн холбооноос оны өмнө хэлэлцээрээ эхэлж, зарим асуудлыг тодорхой болгоё. 2019-2020 оны хэлэлцээрийг байгуулъя, ярилцъя гэдэг саналыг хэд хэдэн удаа хүргүүлсэн. Харамсалтай нь УИХ, Засгийн газрын үйл ажиллагаа тодорхой бус байгаагаас сунжирч, шинэ онтой золголоо. Монголын үйлдвэрчний эвлэлийн холбооноос өчигдөр Хөдөлмөр, нийгмийн хамгааллын сайд С.Чинзоригт хандаж, цалингийн нэмэгдлийн асуудлыг яаралтай  тодорхой болгох санал тавьсан. Энэ сард багш нарын цалинг хэдэн хувиар нэмэгдүүлэх, дараагийн үе шат нь хэзээ болохыг тодорхой болгож хөдөлмөрийн харилцаанд оролцогчдынхоо санаа бодлыг тодорхой болгох хэрэгтэй байна. Учир нь багш нарын өмнөх оны зарим нэмэгдлүүд одоог хүртэл олгогдоогүй. Тодруулбал, 14 аймгийн боловсролын салбарын ажилтнуудын хэлэлцээрээр тохирсон цалингийн нэмэгдэл олгогдоогүй байна. Мөн 11 шинжлэх ухааны хүрээлэнгийн ажилтнуудын цалин огт нэмэгдээгүй.

-Уг нь энэ сарын 1-ээс багш нарын цалинг 10 хүртэлх хувиар өсгөнө гэсэн хүлээлт байсан шүү дээ?

-Энэ сарын 1-нээс багш нарын цалинг нэмнэ гэж Хөдөлмөр, нийгмийн хамгааллын сайд С.Чинзориг удаа дараа урьдчилж хэлсэн. Гэхдээ хэдэн хувиар гэдгээ хэлэхгүй байгаа юм.

-Өнөөдөр Хөдөлмөрийн тухай хуулийн шинэчилсэн найруулгын төслийн асуудлаар хуралдаж байна. Одоо хүчин төгөлдөр мөрдөгдөж байгаа хуульд ямар асуудал, бэрхшээл байна вэ?

-Уг хуулийг 2018 оны зургадугаар сард өргөн барьсан. Маш олон өөрчлөлт тусгасан байгаа. Учир нь хөдөлмөрийн харилцааны хэв шинж цаг үеэ дагаад өөрчлөгдөж байна. Ялангуяа, алслагдсан нөхцөлд уул, уурхай, барилга гээд долоо буюу түүнээс дээш хоногоор гэрээсээ хол ажиллах хөдөлмөрийн хэв маягууд бий болсон. Гэтэл 1999 оны хуульд ийм чиглэлийн зохицуулалт тусгаж өгөөгүй. Тиймээс олон улсын хөдөлмөрийн байгууллагын чиг хандлага, тогтвортой хөгжилтэй уялдуулж, хөдөлмөр эрхлэлтийг зохицуулах нэмэлт зохицуулалтыг бий болгох, хөдөлмөрийн харилцааныхаа хууль тогтоомжид өөрчлөлт оруулах шаардлагатай. Сүүлийн есөн жил шинэчлэлийн асуудлаар гурван тал хамтран ажиллаж байна.

-Ажилд орохоор бүртгүүлсэн болон ажлаасаа гарсан иргэдийн тооны харьцаа ямар байгаа вэ?

-Ажлын байрны тоо нэмэгдсэн зүйл бараг байхгүй. Ажлын байрныхаа баталгааг яаж хангуулах вэ гэдэгт нийгмийн түншлэгч тал, ажилтны төлөөллийн байгууллагууд анхаарч байна.

 Б.Лхам