МУ-ын Ерөнхийлөгч асан Н.Энхбаярын бие тааруу байгаа учир сайд нарын гэх эмнэлэгт хэвтээд хэд хонож байна. Түүний бие тааруу байгааг далимдуулаад зарим нэг нь албан тушаалыг нь булаачих элдэв арга хэрэглэж эхэлсэн. Тухайлбал эдийн засагч Н.Дашзэвэг МАХН-ын их хурлыг хуралдуулах санаачилга гарган гишүүн элсүүлж явна. Түүнд нэг л зорилго бий. Шоронд байгаа Н.Энхбаярыг хусж оронд нь өөр хүн тавих. Ингэх болсон шалтгаан бий аж. Учир нь эдийн засагч Н.Дашзэвэг дэд сайд болох саналаа илэрхийлтэл Н.Энхбаяр зөвшөөрөөгүй аж. Эндээс л асуудал босч шоронд байж намын ажлаа хийлээ гээд л эдийн засагч маань элдэв арга хэрэглэж байгаа бололтой.
  Үүнээс гадна Н.Энхбаярыг зовж явахад нь Шадар сайд Д.Тэрбишдагва тун ойрхон байгаа. Тэрээр даргатайгаа ойр ойрхон уулздаг байж. Гэтэл саяхан холбогдох байгууллагаас шийдвэр гаргаж Н.Энхбаярыг гэр бүлийнхэнээс нь өөр хүнтэй уулзуулж болохгүй гэжээ. Ялангуяа Д.Тэрбишдагвыг онцлон дурдсан байна. Учир нь Н.Энхбаярыг шоронд байж төр засгийн ажилд хэтэрхий их хутгалдаж байна гэж үзсэн бололтой. Тиймээс МАХН-ын дарга Н.Энхбаяр утсаар ажлаа амжуулж, зарим нэгнийг загнаж зэмлэдэг сурагтай.
    Энэ бүх үйл явдалтай зэрэгцэн нэгэн сонирхолтой яриа гарч эхлээд байна. Энэ нь Хууль зүйн шинэхэн сайд Х.Тэмүүжин нэгэн санаачилга гаргахаар ярьж байгаа сурагтай. Тэрээр өнгөрсөн хавар Н.Энхбаярыг хэргээ задлаад, авлигалын сүлжээгээ дэлгэвэл ял хүлээлгэхгүй байж болно. Түүнийг Ерөнхийлөгч байсныг нь хүндэтгээд гэхээсээ илүү асар том гэмт хэргийн сүлжээг задалж буйг нь харж үзээд ял оноохгүй байж болох тухай санаачилга гарган ярьсан ч ямар ч дэмжлэг аваагүй юм. Энэ санаачилга нь тэгсхийгээд л замхарсан. Н.Энхбаяр ч түүний энэ санаачилгыг сонсоод ихэд бухимдаж би гэмт хэрэг хийгээгүй, авлигал өгч аваагүй хүн юугаа ярьдаг юм гэсэн удаатай.
  Харин саяхнаас Хууль зүйн сайд Х.Тэмүүжин Н.Энхбаярын эрүүл мэндийн байдал муу байна. Тиймээс түүнийг авлигал, хээл хахуулынхаа асуудлаар үнэн зөв дэлгэрэнгүй мэдээлэл өгвөл ялыг нь цуцалж болох санаачилга гаргах гэж буй талаар мэдээлэл ирлээ. Энэхүү мэдээлэл нь хир зэрэг үнэн зөв эсэхийг хэн нэгэн гэрчилж ярихгүй байна. Гэхдээ иймэрхүү яриа яригдсан сураг байна. Тэгээд ч энэ нь ямархуу хэмжээнд өрнөхийг урьдчилан таамаглах боломжгүй юм.
  Учир нь ийм санаачилга урьд өмнө манай улсад гаргаж хэрэгжүүлж байгаагүй юм. Тэгээд ч ийм санаачилгыг хэрэгжүүлэх хууль эрх зүйн орчин ч тодорхойгүй байдаг бололтой.
  Ийнхүү Н.Энхбаярыг намынх нь зарим гишүүд даргаас нь чөлөөлөхийг санаархаж байна. Харин сөрөг хүчнийхэн түүгээр дамжуулан бүүр том улс төр хийхээр санаачилга гаргаж болох юм. Харин тэрээр эдгээр санаачилгуудад ямар нэгэн хариу удахгүй өгч мэдэх юм. Мэдээж хамтрагч сөрөг хүчнийхэндээ тийм юм байхгүй гэж гүрийх биз. Харин албан тушаалыг нь булаах гэсэн намынхандаа нэлээд хатуухан хариу илгээж, чангахан сануулгаар бэлэг барьж болох юм. Ийнхүү Н.Энхбаярыг тойрсон яриа тасрахгүй улам л хүрээгээ тэлж эхэллээ.