Монгол Улс ардчилсан тогтолцоонд шилжсэн энэ он жилүүдийн сүүдэр дор С.Зоригийн амь насыг хөнөөсөн аймшигт хэрэг нуугдсаар ирсэн юм. Хэргийг мөрдөн шалгаж эхэлсэнээс хойш 10 орчим удаа мөрдөн шалгах ажлын хэсэг байгуулагдаж, тухай бүртээ хэргийг илрүүлэх ойрхон байна, илрүүлчих шиг боллоо гэсэн утгатай мэдэгдэл хийсээр ирсэн. Энэ хооронд улс төрийн нам, эвсэл, улстөрчдийн урдаа барьдаг лоозон төдий зүйл болсон нь улиран өнгөрсөн түүх гэрчлэх биз ээ. Харин олон нийт итгэл алдралгүй хүлээсээр нэгэнт 20 жилийг ардаа үдсэн байх юм. Дуулиан дагуулсан хэргийг эцэслэж, гэмт хэрэгтнүүдийг торны цаана суулгалаа гэсэн мэдээлэл цацагдсан цаг саяхан. Гэвч хэргийн буруутан гэх ялтан Т.Чимгээ, Б.Содномдаржаа нарыг эрүүдэн шүүсэн хэрэг өнгөрсөн оны мөн үетэй зэрэгцэн гарч ирсэн нь дээрх этгээдүүд хэрэгтэн бус харин ч “хохирогч” болж байх шиг байна. Үүнийг ч гэрчлэх мэт ТЕГ-ын дарга асан, хошууч генерал Б.Хурц тэргүүтэй хүмүүсийн гэм бурууг хэлэлцэх шүүх хуралд ялтан Т.Чимгээ, Б.Содномдаржаа нар хохирогчоор оролцсон. Уг ээдрээтэй асуудалтай зэрэгцэн зургаан өдөр олон нийтийн анхаарлын төвд байсан хэргийг нэмэлт мөрдөн байцаалтад буцаахаар шийдсэн нь бас л сонин өнцөг байв. Учир нь УИХ-ын нэр бүхий гишүүд “Хэрвээ эл хэргийг мөрдөн байцаалтад буцаах, эс бөгөөс Б.Хурц нарт холбогдох хэргийг хэрэгсэхгүй болговол хэргийг шүүсэн шүүгч нар хонгилын шүүгч нар гэдгээ батална” гэх утгатай мэдэгдэл хийж, шүүгч нарыг дарамтлах гэж үзсэн. Азаар ч гэх үү, эзээр ч гэх үү, шүүх эл дарамтнаас ангид байж шийдвэрээ гаргасан. Энэ шийдвэр зөв ч бай, буруу ч шүүх засаглалын хүрээний бүрэн мэдлийнх нь асуудал.

Тэгвэл шүүхийн шийдвэр гарснаас хойш талууд 14 хоногийн дотор шүүхийн тогтоолыг гардаж авах ёстой.

Яг өнөөдрийн байдлаар шүүхийн тогтоолыг гардаж аваагүй байгаагаас үзвэл, талууд буюу хохирогч гэх ялтан Т.Чимгээ, Б.Содномдаржаа мөн талийгаач С.Зоригийн гэргийг Б.Булган нар гомдолгүй юу гэсэн асуултыг асуухад хүргэж байна.

Өөрөөр хэлбэл, шүүхийн шийдвэр энэ сарын 19-нд гарсан гэхээр үүнээс хойш бүхэл бүтэн 7 хоног өнгөрч байна. Шүүхийн тогтоол гардаж авах сүүлийн хугацаа ирэх сарын 2-ноор тасалбар болно. Энэ хугацаанаас хойш тав хоногт багтаж, прокуророос эсэргүүцэл бичихгүй бол шүүхийн шийдвэр тэр дундаа мөрдөн байцаалтын үеэр ямар нэг алдаа дутагдал гаргаснаа хүлээн зөвшөөрч буйн хэрэг юм. Хэрвээ прокуророос эсэргүүцвэл бичвэл талуудаас тайлбар авах ёстой. Уг тайлбарт ялтан буюу хохирогч хэмээгдэж буй Т.Чимгээ, Б.Содномдаржаа нар хэрхэн юу гэж өгүүлэх нь их сонин.  

Тиймээс л Б.Хурц тэргүүтэй есөн эрхэмд гомдолтой хэдэн хүн бий вэ.

Шүүх хурлын үеэр ялтан Б.Содномдаржаа шүүхийн шийдвэрийг хүлээн зөвшөөрөхгүй, гомдол гаргана гэдгээ мэдэгдсэн. Гэвч өнөөдрийг хүртэл сураг ажиг алга. Харин ялтан Т.Чимгээгийн хувьд мөн л гомдолтой гэсэн. Гэхдээ гомдол гаргах эсэхээ хараахан мэдэгдээгүй юм.

Эндээс л Б.Хурц нарт холбогдох хэрэг нэг бол хэрэгсэхгүй болно, үгүй бол хөөн хэлэлцэх хугацаагаа дуусгахаар хавтаст хэрэг шарлаж үлдэх эсэх нь тодорхой болох юм. Ийм сонголт нийгэмд үүссэн нь тодорхой. Тиймээс ирэх сарын 2-ныг хүртэл түр харзная. Тэр болтол асуудал бага  атугай тодорхой болох биз ээ.

Г.Нацаг