Хурган дарга нар байгууллагынхаа газрыг хумсалж, халаасалдаг болох нь сандал ширээний тулаанаас илчлэгдэв.

Тодруулбал, Мал аж ахуйн эрдэм шинжилгээний хүрээлэнгийн үе үеийн захирлууд хүрээлэнгийн мэдлийн газраасаа хумсалж хаус сүндэрлүүлдэг аж. Ингэхдээ газрын зөвшөөрлөө “Залуу судлаачдад зөвлөгөө өгөх төв”, “Номын өргөө” гэсэн уриа лоозонгоор халхавчилж аван тансаг зэрэглэлийн хоёр давхар хаус босгодог байна. Тус хүрээлэнгийн мэдэлд өмнө нь 15 орчим га газар харьяалагддаг байсан бол өдгөө 5 орчим га газар л үлдсэн гэж байгаа.

Ийм “хууль бус” зүйлийг нь хүртэл шинэхэн дарга М.Найданхүү нь хүртэл өөгшүүлж, өмөөрөн “Бүгдээрээ л байшин бариад байхад миний аав яагаад барьж болохгүй гэж” хэмээн хээв нэг хэлж сууна.

Яахав, БСШУС-ын сайдын зөвлөхөөр ажиллаж байгаад тус байгууллагын даргаар томилогдсон хүний эрх мэдэл нь их байх л даа. Тийм ч учраас ийн хаахалзаж буй ч магадгүй. Түүний аав Б.Мижигдорж нь тус байгууллагын зөвлөхөөр ажилладаг бөгөөд 70 насны босгон дээр гавьяат авахад нь хүрээлэнгийн удирдах зөвлөлийн хурлаар 24х24 /007 га/ метрийн хэмжээтэй газар өгчээ. Бараг “бэлэг” гэж ч хэлж болно. Энэ талаар тус хүрээлэнгийн өмнөх захирлаар ажиллаж байсан Т.Батсүх  өөрийн амаар хэлсэн юм.

Түүний хэлснээр хүрээлэнгийн газрыг экс удирдлагууд болох Ё.Загдсүрэн, Ш.Чадраабал, н.Эрдэнэсүрэн нар хаусаа барьсан гэнэ.

Уг хэргийн учиг хэрхэн тайлагдсан талаар уншигч танд доор сийрүүлье. Тухайлбал, Т.Батсүх нь тус газрын хүрээлэнгийн захирлын албан тушаал хашиж байхдаа томилолтод явахаар болжээ. Түүний жолооч нь тэтгэвэрт гарсан үе таарсан учир албаны унаагаа хүүгээрээ бариулж, өөрөө араас нь хувийнхаа унаатай хотоос гарч Өвөрхангайг зорьжээ. Ийн албаны унааг хүүдээ унуулсан учир түүний цалинг гурван сарын хугацаанд 20 хувира торгосон байгаа юм. За энэ ч яахав. Гэвч удалгүй уг шийдвэрийг цуцалж, энэ сарын 28-ны өдөр ажлаас чөлөөлөх тушаал гаргажээ. Энэ хугацаанд түүнийг албан тушаалаа өгөхийг шаардаж оюутан ахуйн найз нь хүртэл гэрт нь ирж зодсон гэх. Ингээд Т.Батсүхийг ажлаас чөлөөлсөн өдөр нь БСШУС-ын сайдын зөвлөхөөр ажиллаж байсан М.Найданхүүг томилсон нь энэ юм. Томилгоог хийхдээ хуулийн дагуу сонгон шалгаруулалт зарлаагүй бөгөөд АТГ-ын ашиг сонирхлын зөрчилгүй гэсэн бичиг нь хүртэл байхгүй гэсэн.

Үүнээс л тэдний хооронд албан тушаалын “зодоон” эхэлжээ. Өөрөөр хэлбэл, хүрээлэнгийн өмнөх захирлаар ажиллаж байсан Т.Батсүх хууль бусаар, хүч хэрэглүүлэн албан тушаалаа өгсөн хэмээн уурсаж үе үеийн дарга нарынхаа булхайг зоригтой дэлгэсэн хэрэг. Ингэх учиг нь шинэ захирал М.Найданхүүгийн аав Б.Мижигдоржийн нэр дээр хүрээлэнгийн хэсэг газар шилжин очсон байна. Тус газрыг анх 2009 онд “Аж ахуй судалгаа, эрдэм шинжилгээ”-ний зориулалтаар авч 2015 онд хугацааг дахин сунгуулсан бөгөөд энэ хугацаанд нэг л мэдэхэд түүний эзэмшлийн газар болсон гэх. 

Эндээс харахад хөшигний цаана ямар хуйвалдаан өрнөдгийг харж болно. Эцэг эхтэйгээ нийлж төрийн газрыг хувааж идэж байна. Гэтэл эгэл жирийн иргэдэд бөөрөнхий гэрээ барих газар олдохгүй гуу жалган дээр суусаар л.

Тиймээс , Ерөнхий сайд аа. Таны танхимын гишүүний зөвлөх хүн ийм л дүр төрхтэй байна. Та “шударга бустай тэмцэнэ” гэж хэдэнтээ хэлсэн. Тэгвэл шударга бус зүйл чинь манай улсын стратегийн чухал ач холбогдолтой энэ газар өрнөж байна. Өөрсдийгөө илчлээд төрийн газрыг хэрхэн зувчуулдагаа олон нийтэд зарлачихлаа. Та мэдсэн ч мэдээгүй юм шиг суусаар байх уу. Захирлууд нь байгууллагаа тойруулж хаусыг хэд хэдээр нь сүндэрлүүлж байхад ажилчид нь малын бивоверын зориулалтаар барьсан шаардлага хангахгүй тарчигхан байшинд амьдрах нь шударга гэж үү. Дахиад хэлье, шударга бустай тэмцэх таны дараагийн алхам энд байна, Ерөнхий сайд аа!

Б.Лхам