Засгийн газрын өнгөрсөн гуравдугаар сарын 6-ны өдрийн хуралдаанаар "Эрдэнэт" үйлдвэрт зургаан сарын хугацаатай онцгой дэглэм тогтоох шийдвэрийг гаргасан. Энэ хугацаанд "Эрдэнэт" үйлдвэрт 150 сая төгрөгийн гэрээ, хэлэлцээр нууцаар хийгдсэн гэх мэдээлэл зарим хэвлэлээр гарсан. Тэгвэл энэ мэдээллийн талаар Засгийн газрын Хэрэг эрхлэх газрын дарга Л.Оюун-Эрдэнэ "Үнэндээ "Эрдэнэт" үйлдвэрт онц дэглэм тогтоосон нь олон хүний эрх ашгийг зөрчиж байгаа. Өөрөөр хэлбэл, 400 орчим сая төгрөгөөр худалдан авалт хийчихсэн хүмүүсийн эрх ашгийг зөрчиж байгаа гэсэн үг. Мэдээж онцгой дэглэмийг дахин сунгах асуудал яригдаж эхлэхэд иймэрхүү мэдээлэл гаргах нь ойлгомжтой. Гэхдээ энэ бол худал, ташаа мэдээлэл. Би мэдээллийг шалгуулахаар АТГ-т хандсан. Үнэхээр тийм зүйл байгаа бол Х.Бадамсүрэнд хариуцлага тооцно. Ер нь бол үйлдвэрийн татвар төлөлтийн багцууд сайжирч байна. Цаашдаа энэ асуудлыг эцэслэн шийдвэрлэхийн тулд шүүхийн маргааныг эхлээд дуусгах ёстой. Харамсалтай нь, дуулиан дагуулсан хэрэг буюу Эрдэнэт, Жастын Ш.Батхүү нар холбогдох хэрэг шүүхээс буцаж байна. Санаатай болон санаандгүй байдлаар шүү дээ. Жишээлбэл, 30 хоногийн дотор өмгөөлөгч гомдол гаргах эрхтэй гэсэн хуулийн заалт байдаг. Жастын Ш.Батхүүгийн өмгөөлөгчид энэ хуулийн заалтыг ашиглаж, 2.5 жил шүүхээс зугтаж байна. Уг нь шүүх үүнийг хянаж үзээд үндэслэлтэй эсэхийг нь үзэх ёстой. Гэтэл Давж заалдахын шүүх нь Анхан шат руугаа шиддэг. Анхан нь буцаадаг байдлаар цаг хожиж байна. Ингэхээр ашиг сонирхолын зөрчил байна гэж үзэхээс аргагүй. Энэ талаар Хууль зүйн байнгын хороонд хандаж байгаа" гэсэн юм. Ингээд сэтгүүлчдийн сонирхсон асуултад хариулт өгсөнийг тоймлон хүргэе.

-Онцгой дэглэм тогтоосон энэ үед худалдах, худалдан авах гэрээг ямар албан тушаалтан байгуулах эрхтэй байдаг юм бэ?

-Хуулийнхаа дагуу үйлдвэрийн дарга нар байгуулна. Шаардлагатай мэдээллийг өгч болно.

-Онцгой дэглэмийг сунгах эсэхийг хаанаас шийдэх бэ?

-Эхний удаад Засгийн газраас шийдвэр гаргана. Сунгах эсэхийг холбогдох байнгын хороодтой зөвшилцөх ёстой.

-Оюутолгойн дүгнэлт юу болсон бэ?

-Их хурал дүгнэлтээ гаргаад Засгийн газарт ирүүлэх ёстой. Энэ хүлээгдэж байна. Хурдан шийдэхгүй бол хэтэрхий их цаг авч байна. Үндсэн хууль хэлэлцэж байгаа учир одоо хэлэлцэх боломжгүй. Гэтэл хүлээгдэж байгаа асуудал олон байна.

-Сайд нарыг УИХ-аас томилох эсэх асуудалд санал нэгдэж чадахгүй байна. Та үүнийг юу гэж харж байна вэ?

-Миний итгэл үнэмшлээр гүйцэтгэх засаглал нь хүчтэй бусад улс шиг байгаасай гэж хүссэн. Манайх парламентийн бүрэн засаглалтай биш шүү дээ. Ерөнхийлөгч, парламентийн хамтарсан засаглалтай. Ерөнхийлөгч, Их хурал нь хүчтэй. Гэтэл Ерөнхий сайд хүчгүй. Ийм л улс. Нуух юм алга. Уг нь Ерөнхийлөгчийг парламентаас сонгодог, эсвэл Ерөнхийлөгчийн засаглалтай байсан бол Үндсэн хуульд заавал нэмэлт, өөрчлөлт оруулах шаардлагагүй байсан. Аль нэг талдаа гарч чадахгүй болохоор ийм шийдэлд хүрлээ. Аргаа бараад гишүүдийн тоог нэмэх үү гэж үзэж байна. Гэхдээ аль нь я төгс шийдэл биш. Хамгийн гол нь 62 гишүүн гарын үсэг зураад дэмжсэн. Тэгвэл дэмжихээсээ өмнө ямар хуульд ямар заалт оруулах гэж байгаагаа сайн нягталж харахгүй яасан юм бэ.

Өөрсдөө шүгэл үлээж, дэмжчихээд ингэж болохгүй л дээ. Нэгдсэн нэг шийдэлд хүрэхгүй юм бол хожим маш том эрсдэл үүснэ. Энэ долоо хоногт эцэслэж дуусаасай гэж хүсэж байна.

Г.Алимаа