Засгийн газрын ээлжит хуралдаанаар Монгол Улсын 2020 оны төсвийг хэлэлцэж УИХ-д өргөн мэдүүлэхээр болсон билээ. Энэ хүрээнд 2019 оны эхний хагас жилийн байдлаар эдийн засгийн өсөлт сэргэж 7,3 хувьд хүрсэн.  Зэсээс бусад голлох ашигт малтмалын үнэ тогтвортой  байж уул уурхай, түүнийг дагасан эдийн засгийн бусад салбарын өсөлт, аж ахуй нэгжүүдийн борлуулалт ашигт ажиллагаа нэмэгдсэн болон татвар гаалийн шинэчлэл, газрын төлбөрийг бүрэн хураах чиглэлээр хууль эрх зүйн орчныг сайжруулсны дүнд 2020 онд төвлөрүүлэхээр төлөвлөсөн төсвийн орлого төлөвлөсөн хэмжээнээс давахаар байна хэмээн үзсэн юм. Үүнтэй холбогдуулж Сангийн сайд Ч.Хүрэлбаатар 2020 оны төсвийн төслийг танилцууллаа. Төсөлд 2020 нэгдсэн төсвийн тэнцвэржүүлсэн орлогыг 2019 оноос 2.1 их наяд төгрөгөөр нэмэгдүүлж, 11.8 их наяд, нийт зарлагыг 2.3 их наяд төгрөгөөр нэмэгдүүлж, 13.9 их наяд, тэнцвэржүүлсэн тэнцлийг -2.1 их наяд буюу ДНБ-ний -5.1 хувь байхаар тооцоолжээ. Мөн хар тамхитай тэмцэхэд 1.3 тэрбум, УИХ, орон нутгийн сонгуульд 43 тэрбум төгрөг зарцуулахаар ирэх оны төсөвт тусгасан байна.

Сангийн сайдын хэлснээр “Эдийн засаг, бизнес хөрөнгө оруулалтын орчныг дэмжих, гадаад худалдааны эргэлтийг нэмэгдүүлэх, татварын тэгш шударга, ил тод байдлыг хангахад чиглэсэн төсвийн орлогын дараах бодлогын арга хэмжээг 2020 онд авч хэрэгжүүлнэ. Тухайлбал, гаалийн шинэчлэлийн хүрээнд Замын -Үүд, Алтанбулаг, Гашуунсухайт боомтуудыг олон улсын жишигт нийцүүлэн шинэчлэх, хүчин чадлыг нэмэгдүүлж, зорчигч тээвэр, ачаа тээвэр, ачаа тээврийн барилга байгууламж, ногоон байгууламжийн цогцолборуудыг ирэх онд барьж дуусгахаар төлөвлөсөн.

Боловсролын үйлчилгээний эрэлт, нийлүүлэлтийг зохистой төвшинд байлгах, зах зээлд эрэлттэй мэргэжлээр суралцах урам зорилгийг залууст өгөх зорилгоор мэргэжлийн боловсролын сургалтын төвд суралцагчдад 2019 оноос олгож эхэлсэн 100 мянган төгрөгийг хоёр дахин нэмэгдүүлж, 200 мянган төгрөгт хүргэх аж. 2012 оноос хойш нэмэгдүүлээгүй байсан цэцэрлэгийн хүүхдийн хоол, Үдийн цай хөтөлбөр болон дотуур байрны хоолны зардлыг тус тус 50 хувиар нэмэгдүүлнэ.

Малчид, хувиараа хөдөлмөр эрхлэгчид 1995 оноос хойш төлж чадаагүй байсан тэтгэврийн даатгалын шимтгэлээ нэг удаа нөхөн төлж, ирэх оноос тэтгэвэр авах боломж олгох. Хөнгөлөлттэй нөхцөлөөр эрт тэтгэвэр тогтоолгосон эхчүүд, эмэгтэйчүүдийн тэтгэврийг нэмэгдүүлэхээр төлөвлөжээ. Улсын төсвийн хөрөнгө оруулалтаар өнгөрсөн онуудад эхлүүлсэн төслүүдийг бүрэн дуусгах, олон жил царцаагдсан төслүүдийг ашиглалтад оруулах санхүүжилтийг нь төсвийн төсөлд тусгах бодлого баримталлаа. Засгийн газрын зүгээс 2021-2024 онуудад төлөгдөх нийт 2.9 тэрбум ам.долларын өндөр хүүтэй гадаад үнэт цаасны төлбөрийг эдийн засаг, төсөвт дарамт үүсгэхгүй байх өрийн зохицуулалтын арга хэмжээг авч хэрэгжүүлнэ” гэлээ.

Мөн эхчүүд тэтгэвэрт гарахад нийгмийн даатгал төлсөн хугацааг хүүхдийнх нь тоогоор үржүүлж бодохоор болсныг хэллээ. Жишээ нь дөрвөн хүүхэдтэй эхэд зургаан жилийг нэмж тооцох аж. Харин багш нарын дундаж цалинг 1.5 сая болгохоор тооцоолсон бол 2020 оны олимпийн наадамд 20 тэрбум, хүүхдийн их наадамд 9.6 тэрбум, Кино урлагийг дэмжих санд 10 тэрбум, Хэлмэгдүүлэлтэд өртсөн иргэдэд 54 тэрбум төгрөгийг тус тус зарцуулахаар төлөвлөжээ.

Дарханы аж үйлдвэрийн паркийн бүтээн байгуулалтад 15 тэрбум, Агаарын бохирдлыг бууруулахад 137 тэрбум, Улсын авто замын санд 55 тэрбум, Харгиа цэвэрлэх байгууламжид 5 тэрбум, Хар тамхитай тэмцэх зорилгоор орон тоо, зардлыг нэмж 1.3 тэрбум, Байгаль орчны эсрэг гэмт хэрэгтэй тэмцэх экологийн цагдаагийн албанд 4.8 тэрбум төгрөг тус тус зарцуулахаар төлөвлөснийг Сангийн сайд тодотголоо.

С.Сүлд