Хятадын өмнөд хэсгийн нүүрсний уурхайд газ дэлбэрснээс 19 уурхайчин амиа алдаж, хэдэн арван хүн шархадсан талаар өчигдөр манай сайт мэдээлсэн билээ. Дэлбэрэлт уржигдар орой Сичуан аймгийн “Шиажиаван” нүүрсний уурхайд болсон юм. Газ дэлбэрэхэд уурхайн орчимд 152 хүн байсан бөгөөд тэдгээрийн 19 нь өчигдөр амиа алдаж, 28 нь газар дор гацсан байсан.

Тэгвэл өнөөдөр гацсан уурхайчдийн 18 нь амиа алдсан талаар Хятадын хэвлэлүүд дахин мэдээллээ. Аврах ангийн 145 ажилчин шуурхай ажиллаж гацсан уурхайчдийг татаж гаргасан ч амиа алдсан байжээ. Харин одоо газар дор 10 уурхайчин амьд үлдсэн байна. Газар дор гацсан уурхайчид цельсийн 90 градусын халуунд байгаа аж.

Тус уурхайг эзэмшдэг “Зежин” компанийг цагдаагийнхан байцааж байна.
Нүүрсний уурхайд осол гарч уурхайчид амиа алдах тохиолдол хятадад элбэг байдаг аж. Өнгөрсөн жил 1973 уурхайчин ажлын байр дээрээ амиа алдсан нь өмнөх жилийнхээсээ 19 хувиар багассан хэрэг байжээ.