УИХ-ын гишүүн У.Хүрэлсүх, Г.Баярсайхан хоёрын зодоон улам хүрээгээ тэлж байна. УИХ-ын гишүүн Г.Баярсайхан шүүхэд хандахаа мэдэгдсэн. Гэвч яг албан ёсоор хандаагүй аж. Харин олны өмнө болсон тэдний хэргийг аль алиных нь гомдолгүйгээр Сүхбаатар дүүргийн цагдаагаас хэрэг үүсгэн шалгаж эхэллээ. Шуурхай байна шүү. Нэг хоногийн өмнө болсон зодооныг маргааш нь хэн нэгнийх нь гомдолгүйгээр хэрэг үүсгэжээ. Тиймээс Сүхбаатар дүүргийн цагдаагийнхан Г.Баярсайхан гишүүнд хэргийг нь шалгаж эхэлснийг дуулган ирж мэдүүлэг өгөхийг хүсхэд “У.Хүрэлсүхийг авлигатай тэмцэх газарт өгөх гэж байгаа, тэнд шалгуулна” гэж утсаар байр сууриа илэрхийлээд очиж мэдүүлэг өгөөгүй гэж эх сурвалж мэдээллээ. Харин У.Хүрэлсүх утсаа салгаад ор сураггүй алга болжээ. Тиймээс Сүхбаатар дүүргийн цагдаагийнхан холбогдож чадаагүй аж. Хэрэв У.Хүрэлсүх утсаа нээхгүй удаад байвал ирэх долоо хоногт гэрийнх нь хаягаар зарлан дуудах илгээхээр шийдвэрлэсэн гэнэ.
Ийнхүү хуулийнхан тэдний үйлдэлд анхаарлаа хандуулж сайн дураараа хэрэг үүсгэлээ. Г.Баярсайхан анх У.Хүрэлсүхийг шүүхэд өгнө гэж байсан. Харин Сүхбаатар дүүргийн цагдаад өгсөн мэдээллээр бол анхны байр сууриасаа буцаж авлигатай тэмцэх газарт хандах бололтой. Авлигатай тэмцэх газарт үнэхээр хандах юм бол өөрсдийн зодооны тухай биш У.Хүрэлсүхийн 14 тэрбумын хэргийг сөхөх гэж байгаа бололтой. Түүнд хэн нэгэн зодооны асуудлаас илүү У.Хүрэлсүхийн 14 тэрбумын гэх хэрэг илүү сонирхолтой гэж зөвлөсөн ч байж мэднэ.
Хамгийн сонирхолтой нь албаны эх сурвалжийн мэдээлж байгаагаар бол УИХ-ын гишүүд ангийнхаа хоёр гишүүнийг эвлэрч учраа олохыг зөвлөжээ. Шүүх, цагдаад хандаж бие биеэ матах хэрэггүй. Тэгээд ч Г.Баярсайхан эхлээд авлигатай тэмцэх газар болон шүүх, цагдаад хандвал У.Хүрэлсүх ч зүгээр байхгүй адилхан хандана. Тиймээс эр хүн шиг учраа олох нь чухал гэжээ. Нэг нь эхлэн заамдаж, нөгөө нь цохисон учраас хоёулаа л буруутай. Хэн нь ч ялахгүй. Тэгэхээр хэн нь ч хожихгүй гэж ярилцжээ.
Үүнээс гадна олны өмнө болсон учраас уг хэргийг УИХ-ын ёс зүйн дэд хороогоор заавал хэлэлцэх ёстой гэдэг дээр гишүүд нэгджээ. Ингэдэг нь хэн нэгнийг буруутгана гэхээсээ илүү эвлэрүүлэх гэсэн аргачлал бололтой. Мэдээж хэн нь буруутайг дотроо ярилцаад бие биенээсээ бас ард түмнээс уйчлал гуйлгаад өнгөрөх гэсэн санаачилга юм. УИХ хоёр гишүүнийхээ асуудалд ингэж хандлаа гэж мэдээлээд л өнгөрнө гэсэн үг.
Одоогийн байдлаар бол УИХ-ын гишүүн У.Хүрэлсүх ард түмнийхээ өмнө буруу үйлдэл үзүүлсэндээ уйчлал гуйж байна гэж өөрийн твиттертээ бичиж үлдээсэн. Харин Г.Баярсайхан таг чиг байгаа.
Ийнхүү түмний өмнө болсон зодооныг УИХ-ын гишүүд намжаах гэж хичээж байгаа бол хуулийн байгууллага шалгах гэж хэрэг үүсгэлээ.
24tsag.mn
Сэтгэгдэл (1)