Нийслэлийн Засаг дарга бөгөөд Улаанбаатар хотын захирагч Э.Бат-Үүл СХД-ийн ерөнхий боловсролын 12-р сургуулийн 2012-2013 оны хичээлийн шинэ жилийн нээлтийн ажиллагаанд оролцлоо.
    Тус сургууль 1948 онд байгуулагдсан 65 дахь хичээлийн шинэ жилийнхээ нээлтийг хийж байгаа аж. Сургууль гурван ээлжээр хичээллэж байсан бол япон улсын буцалтгүй тусламжаар дөрвөн давхар найман ангитай бага ангийн өргөтөгөл ашиглалтад орсноор гурван ээлжээр хичээллэдэг хүндрэлээс гарсан байна. Энэ жил шинээр зургаан настай 280 хүүхэд нэгдүгээр ангид элсэн оржээ. Харин өнгөрсөн хавар тус сургуулийн ес, арваннэгдүгээр ангийг 380 хүүхэд төгссөн аж.
    Хичээлийн шинэ жилийн нээлтэд 12-р сургуулийн авъяаслаг сурагч, багш нар уран бүтээлээсээ толилуулж баяр дээр баяр нэмэв. Тухайлбал 7в бүлгийн хөвгүүдийн хамтлаг:
“Найзуудаа ирээрэй найзуудаа ирээрэй
Нар гийсэн ордондоо зочлоорой” хэмээн цоглогоор дуулсан бол багш Д.Олонбаяр, Н.Өлзийбаяр нар “арванхоёр миний сургууль” хэмээх дууг хоршин дууллаа.
    Энэ дууний үгийг тус сургуулийн Монгол хэл уран зохиолын багш Н.Энхсувд, аяыг нь хөгжмийн багш Н.Бямбацогт нар зохиожээ. Сургуулийн хичээлийн жилийн нээлтийн ажиллагаанд оролцсон Засаг дарга Э.Бат-Үүл захирал Д.Наранцацралт, СХД-ийн Засаг дарга Ц.Болд нартай чадвал хороо тус бүрт, ядаж хоёр хорооны дунд нэг бага сургууль байгуулж бага ангийн сургалтын үйлчилгээг ар гэрт нь ойртуулах талаар санал солилцов.
    12-р сургуулийн хувьд байшин хороололд байдаг тул холоос ирдэг хүүхэд байхгүй. Харин гэр хороолол ихтэй тус дүүргийн зарим сургуулиудын хувьд бага ангийн хүүхэд холоос явах тохиолдол байдаг гэж дүүргийн Засаг дарга Ц.Болд хэллээ.