УИХ-ын өнөөдрийн чуулганаар Хөгжлийн бодлого, төлөвлөлт, түүний удирдлагын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэх асуудлаар хуралдаж байна. Хэлэлцэж байгаа асуудалтай холбогдуулан гишүүд саналаа хэллээ.

О.Баасанхүү: Би дэмжихгүй. 30 жилийн тогтолцоо биш харин хэрэгжүүлж ирсэн хүмүүс нь буруу байсан. Хэдэн Ерөнхийлөгч, Ерөнхий сайд нь шоронгийн хаалга татах гэж байна вэ. Улс төрийн намуудын нэр хүнд ямар байна. Та нар харж байгаа биз дээ. 1990 оноос өмнөх нийгэм сайхан байна гэлээ. Уучлаарай, ганцхан зүйл нь сайхан байсан юм. Ёс суртахуунтай, хүнлэг нийгэм байсан. Үүнээс хойш ёс суртахуунгүй болсон. Ёс суртахуунгүй хүмүүс хэчнээн сайхан бодлого гаргаад ч үүнийгээ өөрсдөдөө эерэг байдлаар ашигладаг. 1990 оноос өмнө төвлөрсөн төлөвлөгөөт эдийн засаг зөв байсан юм шигээр гишүүд ярьж байна. Уучлаарай буруу байсан юм шүү. Зах зээлийн эдийн засагт шилжсэнээрээ хиам идэх нь тансаг хэрэглээ биш гэдгийг ухаарсан. Ядуурлын гол алдаа нь 30 жилийн хугацаанд бодлого ярьж, хэрэгжүүлсэн МАН-ын буруу. Хөгжлийн бодлого буруу байсан гэж байгаа хүмүүс ичээрэй.

УИХ-ын дарга Г.Занданшатар: Хэлэлцэж байгаа асуудалтай холбоотой үг хэлнэ шүү, гишүүн ээ.

О.Баасанхүү: Та нар хар л даа. Монгол Улсын экс хоёр Ерөнхийлөгч АТГ-ын үүдэнд зогсож байна.

УИХ-ын дарга Г.Занданшатар: Уучлаарай, хууль хэлэлцэж байна шүү. Хэрэг хэлэлцээгүй шүү. Б.Бат-Эрдэнэ: Танхим ахалж байгаа Г.Тэмүүлэн, Ж.Бат-Эрдэнэ, Д.Лүндээжанцан гишүүд маш сайн ажиллаж байна. Надад ирсэн мэдээллээр бүх танхимын ирц хангалттай байна. Үндсэн хуулийн танхимын ирц хангалттай байна. Гэхдээ Ж.Бат-Эрдэнэ гишүүн анхаараарай. Нэг гишүүн 30 минут хоцорсон байна шүү. Хуулийн төслийг хэлэлцэхийг дэмжиж байна. Улс төрийн намууд нь бодлогоо барьж чадахгүй, улс төрийн намаар дамжсан хүмүүсийн ашиг сонирхолын зөрчилтэй хууль, тогтоомж батлуулахад гар бие оролцсон гээд олон зүйл бий. Нэг өдөр яриад дуусахгүй байх. Цар тахлын үед маск зүүгээгүй хүнийг халдвар зориудаар тараасан гэж үзэж, хариуцлага хүлээлгэнэ гэж иргэдээ хянаж байна. Гэтэл Төрийн ордонд суусан гишүүд нь хариуцлагагүй байна. Намайг үзэн ядаад хэрэггүй. Их хурлыг Б.Бат-Эрдэнэ муухай харагдуулж байна гээд хэрэггүй. Надаар заавал нэрээ цоллуулах хэрэг байна уу.

Х.Нямбаатар: Тайланд анхаармаар байна. Өөрсдөө хэрэгжүүлэх боломжгүй маш олон зорилт% зорилгыг Засаг дарга нар дэвшүүлдэг. Улаанбаатар хотыг утаагүй болгоно, түгжрэлийг бууруулна, хог боловсруулах үйлдвэр барина гэж өөрсдөө хэрэгжүүлэх ямар ч боломжгүй мөрийн хөтөлбөр дэвшүүлдэг. Тиймээс энэ хуулийн төсөлд ийм зүйлийг нарийн тусгаж өгмөөр байна. Өөрөөр хэлбэл, хэн юу хэрэгжүүлж чадах зүйлээ зорилт болгож дэвшүүлдэг, түүнийгээ эргүүлж тайлагнахдаа тодорхой байдлаар дүгнэлт хийх боломжийг бүрдүүлж өгөх хэрэгтэй. Улс төрийн намууд 2020 оны сонгуулийн мөрийн хөтөлбөрөө Аудитад өглөө.

Нэлээдгүй нь тодотгол хийх ёстой болсон. Манай намын хувьд нэлээд том бодлого дэвшүүлэхээр тусгасан. Хооронд нь уялдуулах хэрэгтэй байна. Өөрөөр хэлбэл, том үйлдвэр барина гээд амалчихдаг. Гэтэл газрын асуудлыг нь шийдсэн гээд хэрэгжилтийг 10 хувь гээд тайлагнадаг. Ийм хийсвэр баймааргүй байна. Чадахгүй зүйлээ уриа лоозон байдлаар амалдаггүй баймаар байна.

Ж.Бат-Эрдэнэ: Би хууль санаачлагчдын нэг. Улс орны хөгжлийг урт хугацаатай хардаг, уялдаа холбоотой авч хэрэгжүүлдэг байх ёстой. Гишүүд ч ийм саналтай байна. Өмнө нь төлөвлөгөөний комисс гэж байсан.

Улс орны хөгжлийг цогцоор нь харж, хөгжүүлэх салбараа тодорхойлдог байлаа. Одоо бол зарим салбарыг толгойлсон сайдаас хамаарч харилцан адилгүй үйл ажиллагаатай байна. Тиймээс энэ хуулийн дагуу хөгжлийг тав, таван жилээр харж, чиглэлээ тодорхойлдог баймаар байна. Ийм боломж бүрэн бий.

Г.Нацаг