МАН-ын "лидер", хамгийн "гавал" нь Б.Чойжилсүрэн бололтой. Үнэндээ Б.Чойжилсүрэнгээс өөр эрчим хүчний салбарыг аваад явчих, боловсон хүчин байхгүй байна уу даа. Эсвэл зүгээр л сайдын суудлын доогуур эрх ашиг солилцож байна гэж хардахаар.

Станцад гарсан ослын улмаас эрдэнэт хүний амь эрсдсэн тул "хариуцлага хүлээнэ" гэж дахин дахин хэлээд байхад нь МАН халгаасангүй. Хариуцлагаа хүлээе гээд байхад нь хүчээр Эрчим хүчний сайдаар улираагаад л. Ямар үйлээрээ тэтгэгдсэн заяа вэ гэж гайхмаар, түүний хэлснээр бол аргаа бараад л. 

2022 оноос хойш л Б.Чойжилсүрэнгийн "өөр арга алга", "салхилахгүй байна", "нар гарахгүй байна" гэсэн гоморхлыг сонслоо. Бухын доодхыг харж үнэг турж үхнэ гэгчээр Б.Чойжилсүрэнг эрчим хүчний салбарт дэвшил авч ирэхийг найдаж хүлээвэл бидний нас хүрэхгүй байх.

Бүхэл бүтэн 3 жилийн хугацаанд ямар нэгэн ажлын ахиц дэвшил, үр дүн өдийд гарчихмаар. Гэтэл өнөө л мунгинаа Чойжоо. Мэдэхгүй, болохгүй, бүтэхгүй. Дулааны цахилгаан станцад аваар гарчихаад байхад "өө, Эрчис Монголд өгчихсөн шүү дээ, эрчим хүчний яаманд харьяалалгүй, хэн хариуцлага хүлээх юм бүү мэд" гэх нь холгүй. Ийм хүнээр Эрчим хүчний салбарын толгойг мэдүүлчихээд сууж байгаа МАН ч гэж МАН л юм. 

Тэр бүхэл бүтэн салбарын мэдэх нь битгий хэл, өөрийнхөө компанийн ажлыг ч мэддэггүй л хүн шүү дээ. UB palace-ийн газрын таны хамаарал бүхий компани авчихаж гэхэд "ямар чиглэлээр үйл ажиллагаа явуулах гэж байгааг нь мэдэхгүй байна" л гэж байв. Гэтэл тэнд барилгын ажил үргэлжилсээр байна. Үнэндээ түүний сайдаар ажилласан жилүүдэд Эрчим хүчний салбар дээрдсэнгүй. Харин өөрийнх нь бизнес яасан бол доо. 

М.Гал