Сонгуулийн сурталчилгааны хоног дуусахад гурав хоног үлдлээ. Тэд нэгэн зэрэг гараанаас эхэлж, өдгөө хугацааныхаа гуравны хоёрыг нь туулжээ. Тэдний хичээл зүтгэл ирэх лхагва гарагт иргэдийн өгсөн саналаас тодорхой болох юм.

УИХ-ын сонгуулийн тухай хуулийн дагуу сонгуульд оролцох нам, эвслийн мөрийн хөтөлбөр нь Монгол Улсын төсвийн тогтвортой байдлын тухай болон Монгол Улсын урт хугацааны хөгжлийн бодлогод нийцсэн байх ёстой. Тодруулбал, мөнгө, эд хөрөнгө амлах, үнэгүй болон хямдруулсан үнээр үйлчлэх, улс, орон нутгийн салбарын орлогыг бусдад хандивлах, уул уурхайн салбарын орлогыг хишиг, хувь болгож хуваарилах зэргийг хуулиар хориглодог. Бид өмнөх дугаартаа МАН, АН болон ШИНЭ эвсэл, Та бидний эвслээс дэвшүүлсэн мөрийн хөтөлбөрийн онцлох заалтаас танилцуулсан билээ. Энэ удаад бусад нам, эвслүүд эдийн засгийн чиглэлээр ямар зорилт дэвшүүлснийг тоймлон хүргэж байна.

Зөв хүн электорат “Бизнесийн сарын хүүг 1 хувиас доош буулгах бодлого баримтална”

• Төсөв, мөнгө, гадаад худалдаа, татвар, үнэ, ханш, хүүгийн харилцан нягт уялдаатай, гадаад дотоод орчны өөрчлөлтөд түргэн зохицох макро эдийн засгийн удирдлагыг хэрэгжүүлнэ.
• Улсын зээлжих зэрэглэлийг ахиулж гадаад, дотоод хөрөнгө оруулалтыг нэмэгдүүлэх чиглэл баримтална.
• Инфляцийг тогтвортой нам дор түвшинд барина.
• Төлбөрийн тэнцлийг алдагдалгүй төлөвлөн хэрэгжүүлэх, төгрөгийн ханшийн тогтвортой байдлыг хангана.
• Хөрөнгийн урсгалыг зохицуулалттай болгож, гадаадын банкууд тэнцвэртэй ажиллах эрх зүйн орчныг нээх замаар бизнесийн сарын хүүг 1 хувиас доош буулгах бодлого баримтална.
• Малчид, мал аж ахуйн хөдөлмөр эрхлэгчдийн ахуй соёл, нийгмийн хангамжийг шинэ шатанд гаргах бодлого баримтална.
• Хүн амын орлогын өмөн нэмэгдэх шаталсан татварыг нэвтрүүлж, орлогын хэт ялгааг багасгах хөшүүрэг болгоно.
• НӨАТ-ын хувь хэмжээ, хэрэгжүүлэх арга замыг эргэн харж бага, дунд орлоготой иргэд, аж ахуйн нэгжид үүрэх татварын ачааллыг бууруулна.
• Эдийн засаг, бизнест тэгш боломж, шударга өрсөлдөөнийг бий болгох зарчмыг мөрдлөг болгон хөдөлмөрлөсөн нь сайхан амьдардаг, хичээсэн нь амжилт гарагдаг, боломж чадвараар дутуугаа гээдэггүй, хүний наад захын эрэлт хэрэгцээ хангагдсан, шударга нийгмийг цогцлоон байгуулна.

Эх орончдын нэгдсэн нам “Архи, согтууруулах ундааны үйлдвэрлэлд төрийн монопол тогтооно”

• Архи, согтууруулах ундааны үйлдвэрлэлд төрийн монопол тогтооно.
• Монгол Улсын нийт баялгийг үнэлж, эдийн засгийн эргэлтэд оруулах нөхцөлийг бүрдүүлнэ.
• Ипотекийн зээлийн боломжийг өргөжүүлж, хүүг бууруулж, бага орлоготой иргэд, малчид, гадаадад ажилладаг иргэд, залуу гэр бүл хамрагдах нөхцөлийг бүрдүүлнэ.
• Стратегийн ач холбогдолгүй төрийн өмчийг хувьчилна.
• Үндэсний хөрөнгө оруулалтыг хөгжүүлэх бодлогоор “Ард түмний IPO” үндэсний хөтөлбөрийг хэрэгжүүлж, эхний ээлжинд зөвхөн Монгол Улсын иргэдэд Тавантолгойн ордын 30 хүртэлх хувийг Монголын хөрөнгийн биржээр хаалттай арилжаалж, хөрөнгийн эх үүсвэрийг тус компанийн хөгжлийн хөрөнгө оруулалтад чиглүүлнэ.
• Үйлчилгээний бизнесийг хөгжүүлнэ.
• Экспорт, импортын нэг цонхны бодлого хэрэгжүүлж, үндэсний үлйдвэрлэлээ дэмжинэ.
• Засгийн газар Монголбанкны валдютын нөөцөөс давсан өргүй байх зарчмыг тогтооно.
• Монголбанкнаас Засгийн газрын өрийг санхүүжүүлэх, мөнгө хэвлэж төсвийн алдагдал нөхөхийг хатуу хориглоно.

Ард түмнээ хайрлая нам “Хүчтэй Ерөнхийлөгчийн засаглалыг дэмжинэ”

• Улс орон, ард түмнийг өр зээлийн барьцаанд оруулсан, улсын эдийн засаг, санхүүгийн нөөцийг шавхан хоосолсон, эх орон, ард түмний язгуур эрх ашигт хохирол учруулсан улстөрийн нам, бүлэглэл, улстөрчдөд хуулийн хариуцлага заавал хүлээлгэнэ.
• Монгол төрийн бодлогын уламжлалыг хадгалсан хүчтэй Ерөнхийлөгчийн засаглалыг дэмжинэ.
• Засгийн газар, нутгийн өөрөө удирдах байгууллагын төсөв, мөнгө, хүний нөөц, эд хөрөнгийн зохистой эрх мэдлийн тэнцлийг хангасан эрх зүйн шинэ орчин бүрдүүлнэ.

Ард түмний нам

• Макро эдийн засгийн тогтвортой орчинг бүрдүүлж, дундаж давхаргыг нийгмийн зонхилох бүлэг болгоно.
• Эдийн засаг жил бүр тогтвортой өсөж, ажил эрхлэлт тасралтгүй нэмэгдүүлэх.
• Хариуцлагатай уул уурхайг хөгжүүлж, нэмүү өртөг шингэсэн боловсруулах үйлдэр байгуулах.
• Мөнгө угаах болон терроризмыг санхүүжүүлэхтэй тэмцэх тогтолцоог боловсронгуй болгох.
• Бичил, жижиг, дунд үйлдвэрлэлийн. Бэлтгэн нийлүүлэлт, борлуулалтын тогтолцоог кластерийн зарчмаар хөгжих нөхцөлийг бүрдүүлэх.
• Монгол Улс, ОХУ, БНХАУ гурван улсын эдийн засгийн корипор бий болж, гадаад харилцааны тэнцвэртэй байдлыг хангах.
• Эдийн засгийн хөгжлийг дэмжих дэд бүтцийг хөгжүүлэх.
• Мэдээллийн технологийн салбарыг дэмжиж, эдийн засагт оруулах хувь нэмрийг нэмэгдүүлэх,
• Бүс нутгийн эдийн засаг, худалдааны интеграцад нэгдэж, худалдааг хөнгөвчилнө.

Б.Лхам