Хууль зүй, дотоод хэргийн яамнаас ирэх дөрвөн жилд хийх ажлынхаа талаар танилцууллаа.
Энэ талаар ХЗДХ-ийн сайд Х.Нямбаатар “Засгийн газрын үйл ажиллагааны хөтөлбөр боловсрогдож УИХ-ын ээлжит бус чуулганд өргөн баригдсан. Энэ хүрээнд ХЗДХЯ-аас 2020-2024 онд хууль зүйн бодлого, шинэчлэлийн хүрээнд ямар үйл ажиллагаа явуулах талаар багтаасан.
Нэгдүгээрт, 2020-2024 онд хэрэгжүүлэх Засгийн газрын үйл ажиллагааны хөтөлбөр, хоёрдугаарт, 2020-2025 он хүртэлх үндсэн чиглэл, гуравдугаарт, “Алсын хараа-2050” бодлогод нийцүүлэн “Эрх зүйн шинэтгэлийн хөтөлбөр-2” буюу урт хугацааны бодлогын баримт бичиг боловсруулалт хийгдэж байна.
1992 онд Үндсэн хууль батлагдсан. Үүний дараа 1998 онд УИХ-аас “Эрх зүйн шинэтгэлийн хөтөлбөр” бодлогын баримт бичгийг баталсан. Энэ нь 22 жилийн хугацаанд дүгнэлт хийгдээгүй. Хэрэгжилтийн тайлан эцэслэгдэж гараагүй. Өөрөөр хэлбэл, үүнээс хойш шинэ бодлогын баримт бичиг энэ салбарт гараагүй байна. 2002, 2003 онд эрх зүйн шинэтгэлийн давалгаанууд эхэлсэн. Үүгээр Иргэний болон Эрүүгийн хууль тогтоомжийн бүхэлд нь шинэчилсэн байдаг. 2015-2017 эрүү, зөрчлийн багц хууль тогтоомжууд батлагдан гарсан эрх зүйн шинэчлэлийн дараагийн давалгаа хийгдсэн ч хувийн эрх зүйн болон арилжааны эрх зүй энэ давалгаанд өртөөгүй.
Тиймээс эдийн засгийн өсөлтийг дэмжсэн эрх зүйн орчныг бүрдүүлэх уриатай Эрх зүйн шинэчлэлийн хөтөлбөр 2050, Эрүүгийн эрх зүйн шинэчлэл бусад хууль тогтоомжийн шинэчлэл гэсэн таван дэд бүлгийн шинэчилнэ.
2002 оноос хойш өнөөдрийг хүртэл хугацаанд Иргэний хууль тогтоомж өмнөө тавьсан зорилгоо төдийлөн хангалттай гүйцэтгэж чадсангүй. Мөн УИХ, Засгийн газраас шинэчлэх талаар дорвитой алхам хийж чадаагүй. Цаашид хөрөнгийн зах зээлээ дэмжиж, төрийн өмчит компанийг илүү нээлттэй болгоё гэвэл төрийн өмчийн эзэмшлийн хувьцааг дотоодын хөрөнгийн биржээр дамжуулж нээлттэй худалдаалах, төр гагцхүү алтан хувьцаа эзэмших замаар шийдвэр гаргахад нь оролцох боломжийг нээх учиртай. Тиймээс хувийн эрх зүйн салбарт дорвитой алхам хийж, шинэчилнэ.
Б.Лхам
