С.Амарсайхан нийслэлийн Засаг дарга байхдаа Баянхошуу, Ханын материал, 3,4  дүгээр хороолол чиглэлд агаарын дүүжин тээврийг ашиглалтад оруулахаа мэдэгдэж байв. 2021 оны зургаадугаар сард эхний маршрут болох дээрх чиглэлийг ашиглалтад оруулж, иргэдэд үйлчилгээ үзүүлэх тухайгаа онцолж байлаа. Үүнийгээ тодотгож Төв талбай дээр дүүжин тээврийн загварыг танилцуулж байсан нь ердөө долоон сарын өмнөх үйл явдал.

Тэгэхэд нийслэлийн нэгдүгээр хүний энтэй явсан С.Амарсайхан “Бид Улаанбаатар хотын оршин суугчдын замын дэд бүтцийн нөхцөл байдлыг зөвхөн такси, автобусаар биш бүрэн цогцоор нь шийдвэрлэж, олон төрөлт нийтийн тээврийн үйлчилгээг бий болгож байна.

Олон төрөлт болгоно гэдэг нь иргэдэд илүү сонголт бий болгож буй хэрэг. Сонголт байхгүй учраас л жилд 270 сая зорчигч тээвэрлэдэг байсан нийтийн тээвэр өнөөдөр 180 сая зорчигч тээвэрлэдэг болтлоо буурсан” хэмээгээд “Энэ тээвэр нь анхнаасаа цас ихтэй, уулархаг газруудад зориулагдсан технологи. Дэлхийн олон хот үүнийг нийтийн тээвэрт ашиглаж байгаа бөгөөд цаг агаарын хувьд -50, +50 градуст хэвийн ажиллана. Дотоод гадаадын олон мэргэжлийн хүн бүх талаас нь судалж аюулгүй байдлыг нь хангасан учраас бид хэрэгжүүлж болно гэж үзэж байгаа юм” гэж байв.

Түүнээс хойш С.Амарсайхан даргын байр суурь, санаалчилга, бодит хөрсөн дээр бууж ажил хэрэг болсонгүй. Болсонгүй гэдэг нь ирэх онд нээлтээ хийх учиртай дүүжин тээврийн бүтээн байгуулалт эхэлсэн тухай нэг өгүүлбэр байтугай цэг, таслал тавьсан талаарх мэдээ яваагүй хэрэг.

Үүнд коронавирусийн цар тахал, УИХ-ын ээлжит сонгуулийн уур амьсгал нөлөөлсөн байж мэдэх. С.Амарсайхан дарга Төв талбай баруун талд байрлах оффиссоо өөрчилж, саарал ордон руу буурь сэлгэж, УИХ-ын гишүүний очир тэмдэг зүүснийг эс тооцвол өнөөх дүүжин тээвэр нь таг чиг.

Сонирхолтой нь, хотын дарга байхдаа эхлүүлж байгаа түүний санаачилга Засгийн газрын төвшинд ажил хэрэг болохоор орж ирээд байна. Энэ нь Засгийн газрын ХЭГ-ын дарга Л.Оюун-Эрдэнийн хэлсэн үгтэй холбогдоно. Тэрбээр “Ирэх дөрвөн жилийн хугацаанд нийслэл хотыг баруунаас зүүн тийш холбосон дүүжин тээвэр барина” хэмээн чуулганы нэгдсэн хуралдааны индэрээс мэдэгдэв.  

Ингэхдээ "Шууд дөрвөн жилийн дотор метро барина гэдэг худлаа болчихоод байна. Тэгэхээр бид гэр хороолол хэсэг рүү дүүжин тээвэр барина. Улаанбаатар хотыг баруунаас зүүн тийшээ соронзон тээврийн асуудлаар холбоос хийгээд бага цэгт эргэх автобусны төрөл тоог олшруулахаар замаар илүү бодитой шийдвэрлэгдэнэ" гэсэн нь анхаарал татав.

Санаж байгаа бол “Бид сонгуулиас сонгуулийн хооронд ямар нэг асуудлыг ярьдаг байж болохгүй. Бидний гаргаж буй шийдэл, танилцуулж буй асуудал хотын нийтлэг эрх ашиг, улс орны хөгжилтэй холбоотой.

Тиймээс улс төрийн оноо авах гэж болохгүй, бүтэхгүй зүйлсийг ярьж иргэдээ хуурч мэхэлдэг цаг өнгөрсөн. Ялангуяа хотын удирдлагын хувьд явуургүй ажил хийх шаардлага байхгүй.

Түүнээс гадна Засгийн газраас Улаанбаатар хотын замын түгжрэлийг буруулах болоод нийтийн тээврийн шинэчлэлийг хийх тал дээр судалгаа, тооцоо хийх үүрэг даалгаврыг өнгөрсөн зургаадугаар сард өгсөн. Үүний дагуу судалж, ТЭЗҮ-г хийж, санхүүжилтийн асуудлыг тодорхой хэмжээгээр шийдвэрлэн өнөөдөр Засгийн газрын Хэрэг эрхлэх газрын дарга болон салбарын сайдуудад танилцуулж байна. Өөрөөр хэлбэл, Агаарын дүүжин тээвэр Улаанбаатарт бүрэн хэрэгжих боломжтой. Бид тооцоо судалгаагаа хийсэн гэсэн үг.

Бид Улаанбаатар хотын оршин суугчдын замын дэд бүтцийн нөхцөл байдлыг зөвхөн такси, автобусаар биш бүрэн цогцоор нь шийдвэрлэж, олон төрөлт нийтийн тээврийн үйлчилгээг бий болгож байна” гэх С.Амарсайханыг хотын дарга байхад хэлж байсан үг одоо ч хуучраагүй байна.

Нөгөөтэйгүүр, агаарын дүүжин тээврийн санхүүжилтийг Францын Засгийн газрын хөнгөлөлттэй зээлээр шийдвэрлэж, Засгийн газар сангийн яамаар дамжиж эцэслэгдэж зөвшөөрөл нь олгогдсон тохиолдолд бид дөрөвдүгээр сард ажлаа эхлэх бүрэн бололцоотой гэсэн түүний тайлбар одоо ч ажил хэрэг болоогүй нь хачирхалтай. Юм болгоныг, бүтээн байгуулалт бүрийг коронавирусийн цар тахалтай холбон тайлбарлах нь өөрөө өрөөсгөл.

Г.Эрхэс