УИХ-ын гишүүн асан Д.Эрдэнэбат болон Сангийн сайд асан Б.Болор, Монголбанкны Ерөнхийлөгч асан Н.Золжаргал, Д.Ганбат Д.Доржханд, Б.Минжбадам, Л.Санжаадорж нарын долоон хүнд холбогдох шүүх хурал шүүгдэгчийн нэгнийх нь биеийн байдал муудсАны улмаас энэ сарын 24 буюу өнөөдөр 09.00 цаг хүртэл хойшлоод байсан билээ. Тэгвэл шүүх эхэлсэн бөгөөд шүх хуралд Д.Эрдэнэбат, Б.Болор нар өөрийн биеэр оролцож байна.

Нийслэлийн Прокурорын газраас нийт 187 хавтас бүхий эрүүгийн хэргийг Сүхбаатар дүүргийн Эрүүгийн хэргийн анхан шатны шүүх 2020 оны дөрөвдүгээр сарын 08-ны өдөр шилжүүлсэн байдаг. Энэ дагуу шүүх хуралдаан Сүхбаатар дүүргийн Эрүүгийн хэргийн анхан шатны шүүхэд энэ сарын 17-ны өдрийн 10.00 цагт эхэлсэн юм. Нийт тав дахь өдрөө үргэлжилсэн шүүх хуралдааны үеэр шүүгдэгч Б.Минжбадамын биеийн эрүүл мэндийн байдал муудсантай холбогдуулан завсарлага авснаар өнөөдөр үргэлжилж байна.

Хэргийг нэхэн сануулахад, тэднийг “Эрдэнэт” үйлдвэрийн 49 хувийн хувьцааг худалдан авах Засгийн газрын эрхээс татгалзаж, “Монголын зэс” компанид олгох ажлыг зохион байгуулахад оролцсон гэх хэрэгт яллагдагчаар татан шалгаж, эхэлсэн юм.

Тодруулбал, шүүгдэгч Д.Эрдэнэбат, Б.Болор, Н.Золжаргал нарт Эрүүгийн хуулийн ерөнхий ангийн 1.9 дүгээр зүйлийн 1, 3.3 дугаар зүйлийн 1 дэх хэсэгт заасныг тус тус журамлан Эрүүгийн хуулийн тусгай ангийн 22.1 дүгээр зүйлийн 1 дэх хэсэгт зааснаар яллах дүгнэлт үйлдэж, хэргийг шүүхэд шилжүүлсэн юм.

Харин шүүгдэгч Д.Ганбатад Эрүүгийн хуулийн тусгай ангийн 22.4 дүгээр зүйлийн 6, мөн хуулийн тусгай ангийн 11.6 дугаар зүйлийн 1 дэх хэсэгт зааснаар, шүүгдэгч Б.Доржханд, Б.Минжбадам нарт мөн хуулийн тусгай ангийн 22.1 дүгээр зүйлийн 2 дахь хэсэгт зааснаар, шүүгдэгч Л.Санжаадоржид Эрүүгийн хуулийн тусгай ангийн 22.5 дугаар зүйлийн 1 дэх хэсэгт заасанаар тус тус яллах дүгнэлт үйлдэж холбогдох хэргийг шүүхэд шилжүүлсэн нь энэ юм.

Эрүүгийн хуулийн 22.1 дүгээр зүйл. 

1. Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, бусдад давуу байдал бий болгосон бол нийтийн албанд томилогдох эрхийг 2-5 жил хүртэл хугацаагаар хасаж 5400 нэгжээс 27000 нэгжтэй тэнцэх хэмжээний төгрөгөөр торгох, эсхүл 1-5 жил хүртэл хугацаагаар зорчих эрхийг хязгаарлах, эсхүл 1-5 жил хүртэл хугацаагаар хорих ял шийтгэнэ.

2. Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж их хэмжээний хохирол учруулсан бол нийтийн албанд томилогдох эрхийг 2-5 жил хүртэл хугацаагаар хасаж 5400-27000 нэгжтэй тэнцэх хэмжээний төгрөгөөр торгох, эсхүл 1-5 жил хүртэл хугацаагаар зорчих эрхийг хязгаарлах, эсхүл 1-5 жил хүртэл хугацаагаар хорих ял шийтгэнэ.

3. Энэ зүйлийн 1, 2 дахь хэсэгт заасан гэмт хэргийг улс төрд нөлөө бүхий этгээд үйлдсэн бол нийтийн албанд томилогдох эрхийг 5-8 жил хүртэл хугацаагаар хасаж 10 мянган нэгжээс 40 мянган нэгжтэй тэнцэх хэмжээний төгрөгөөр торгох, эсхүл 2-8 жил хүртэл хугацаагаар хорих ял шийтгэнэ.

Эндээс үзвэл, хэрвээ шүүхээс гэм буруутай гэж үзвэл, тав хүртэлх жилийн хорих ялаар шийтгүүлэх магадлалтай, эс бөгөөс хэргийг нэмэлт мөрдөн байцаалтад буцаахыг үгүйсгэхгүй. Гэвч улс төрд нөлөө бүхий эрхмүүдэд холбогдох шүүх хурлын процессоос үзвэл, уг хэргийг нэмэлт мөрдөн байцаалтад буцаах магадлал тун бага байгаа юм. Хэрвээ Д.Эрдэнэбат шүүхээс ял авбал, АН-ын дотоод асуудал хурцдах нь дамжиггүй.